Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 165 Hüküm no: 161 Orijinal metin no: [38a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çelebi b. Fazlullah’a kiralanan Hoca Pîrî Vakfı’na ait evin tamir masrafının ödendiği, evin vakfa teslim edildiği Mahmiye-i Kostantıniyye mahallâtından Samanviran mahallesinde vâki‘ merhûm Hoca Pîrî Vakfı’na hâlâ meşrûtiyyet üzre mütevellîye olan Fâtıma bt. Mahmud nâm hâtun meclis-i şer‘-i şerîfe hâzıra olup işbu râfi‘ü’l-kitâb kıdvetü’l-a‘yân Ali Çelebi b. Fazlullah mahzarında takrîr-i kelâm edip vakf-ı mezbûrdan mahalle-i merkūmede vâki‘ lede’l-ahâlî ma‘lûmetü’l-hudûd olan menzili bundan akdem mezkûr Ali Çelebi’ye on yıla icâreye verdikde menzil-i mezbûru ta‘mîr ve termîm edip ziyâde binâ ihdâs etmek için kendi mâlından altmış iki bin akçe harc u sarf eylemek için izin verip ve merkūm Ali Çelebi meblağ-ı mezkûru menzil-i mesfûra harc u sarf eylediğin isbât etmeğin hâlâ zikr olunan altmış iki bin akçeyi mezkûr Ali Çelebi’ye târih-i kitâbdan üç gün tamâmına teslîm edip ve merkūm Ali Çelebi dahi menzil-i mezbûru cânib-i vakfa teslîm ta‘ahhüd etmişizdir dedikde, müşârun-ileyh Ali Çelebi mütevellîye-i merkūmeyi kelâm-ı meşrûhunda bi’l-muvâcehe tasdîk edip ba‘dehû meblağ-ı mezkûra emr ve kabûlü hâviye kefâlet ile Fâtıma bt. Şaban nâm hâtun kefîl olup mâ vaka‘a bi’t-taleb ketb olundu. Tahrîren fî 28 min Şevvâl sene 1002. Şuhûdü’l-hâl: Hüseyin Çavuş el-mübâşir, Ali Çavuş b. Hamza, İbrahim Çelebi b. Ali el-kadı, Abdülganî b. Nezir.