Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 167 Hüküm no: 164 Orijinal metin no: [38b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hassa mehterlerden Hasan Bey ile kapıcılardan Mehmed Bey’in alacak-verecek davasında beyanlarının kaydedildiği Mahmiye-i Kostantıniyye’de Çavuş mahallesinde sâkin hâssa mehterlerden Hasan Bey b. Abdullah nâm kimesne meclis-i şer‘-i şerîfe Dergâh-ı âlî çavuşlarından Ömer Çavuş mübâşeretiyle Bâb-ı sa‘âdet bevvâblarından Mehmed Bey b. Hüseyin nâm kimesneyi ihzâr ve mahzarında takrîr-i kelâm edip mezbûr Mehmed Bey zimmetinde cihet-i karzdan yüz otuz kuruş ki Osmânî hesâbı üzre dokuz bin yüz akçe eder hakkım vardır, taleb ederin suâl olunsun dedikde, gıbbe’s-suâl mezbûr Mehmed Bey cevâb verip fi’l-vâki‘ sâbıkda mezbûr Hasan Bey’e cihet-i karzdan zikr olunan mikdâr deynim var idi. Lâkin ba‘dehû dört bin seksen akçesin mezbûra nakid teslîm edip beş bin yirmi akçesi bâkī kalıp bâkī-i mezbûr mukābelesinde mezkûr Hasan Bey yedinde kendi mülkümden bir enâr nakışlı yeşil altınlı eyn? serâser ve bir lâle nakışlı uzun yenli serâser kaftan ve bir çift altın topuk bileziği rehn-i makbûz vaz‘ eylemiş idim, rehn-i mezkûru bana teslîm etsin, ben dahi bâkī-i mezkûru merkūm Hasan’a edâ edeyin deyip merkūm Hasan zikr olunan dört bin seksen akçeyi ve rehni inkâr eyledikde tarafeynden sâdır olan kelâm bi’t-taleb ketb olundu. Tahrîren fî 28 min Şevvâl sene 1002. Şuhûdü’l-hâl: Mevlânâ Mehmed b. el-Hâc Mehmed, Abdülganî b. Nezir, Mustafa Bey b. Mehmed, Hasan Bey muhzırbaşı.