Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 166 Hüküm no: 163 Orijinal metin no: [38a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şerifezâde Mehmed Çelebi Vakfı’nın Yusuf Bey b. Mustafa’da olan alacağının tahsili Mahmiye-i İstanbul’da vâki‘ merhûm Şerifezâde Mehmed Çelebi Vakfı’na hâlâ mütevellî olan Yusuf b. Üveys nâm kimesne meclis-i şer‘-i şerîfe kasaba-i Kasımpaşa’da Eyyühüm mahallesinde sâkin Yusuf Bey b. Mustafa nâm sipâhiyi ihzâr ve mahzarında takrîr-i da‘vâ edip mütevellîsi olduğum vakf-ı mezkûr mâlından mesfûr Yusuf Bey zimmetinde cihet-i karzdan otuz üç bin üç yüz akçe olup ve meblağ-ı merkūmu i‘tirâf dahi eylemişdir, hâlâ vakf için tevliyeten taleb ederin dedikde gıbbe’s-suâl mezbûr Yusuf Bey cevâb verip vakf-ı mezbûr mâlından benim zimmetimde bir akçe ve bir habbe yokdur, lâkin anamın vakf-ı mesfûra on beş bin akçe deyni olup deyn-i mezkûr benim zimmetimdedir deyû mukaddemâ ben ikrâr ve i‘tirâf edip muvâza‘a eylemiş idim dedikde mezbûr Yusuf Bey’den sâdır olan kelâm mütevellî-i merkūm talebiyle ketb olundu. Tahrîren fî evâhiri Şevvâl sene 1002. Şuhûdü’l-hâl: Hasan b. Abdullah, Behrâm b. Abdullah, Yusuf b. Abdullah.