Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 168 Hüküm no: 166 Orijinal metin no: [38b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. el-Hâc Mustafa’nın kaçan câriyesi Reftar bt. Abdullah’ı âzat etmediği ve kölesi olduğu Oldur ki, mahmiye-i İstanbul’da Nevbethâne mahallesinde sâkine Ayşe bt. el-Hâc Mustafa nâm hâtun tarafından husûs-ı âti’z-zikre Mehmed b. Ahmed ve Ali Bey b. Abdullah nâm kimesneler şehâdetleriyle vekâleti sâbite olan Mehmed b. Nasuh nâm kimesne meclis-i şer‘-i şerîfe Dergâh-ı âlî çavuşlarından fahrü’l-akrân Hızır Çavuş mübâşeretiyle Mümine bt. Ali nâm hâtunu işbu orta boylu sarışın açık kaşlı elâ gözlü Boğdaniyyetü’l-asl Reftar bt. Abdullah nâm câriye ile ihzâr ve mahzarlarında takrîr-i da‘vâ edip işbu câriye-i mevsûfe-i mezkûre müvekkilem merkūme Ayşe’nin mülk câriyesi olup mülkünde iken târih-i kitâbdan bir yıl dört ay mukaddem ibâk eylemiş idi. Hâlâ vekâleten taleb ederin suâl olunsun dedikde, gıbbe’s-suâl câriye-i merkūme cevâb verip fi’l-vâki‘ sâbıkda ben mezkûre Ayşe’nin mülk câriyesi idim, lâkin mesfûre Ayşe’den beni sâlifü’z-zikr Mümine Hâtun yirmi beş bin akçeye iştirâ edip ba‘dehû beni i‘tâk eyledi deyip ve mezbûre Mümine Hâtun dahi câriye-i mezkûreyi bi’l-muvâcehe tasdîk edip vekîl-i mezbûr inkâr eyledikde, ba‘de’l-istişhâd câriye-i merkūme beyyine-i âdile ikāmetinden âcize olup istihlâf etdikde, cânib-i şer‘-i mutahhardan iki emîn irsâl olunup müvekkile-i mezkûre Ayşe câriye-i mesfûreyi bey‘ ve hibe ve i‘tâk etmeyip bi vechin mine’l-vücûh mülkünden ihrâc etmediğine tahlîf edip yemîn billâh etdüğün emîn-i mezkûreyn meclis-i şer‘de ihbâr edip mâ vaka‘a bi’t-taleb ketb olundu. Tahrîren fî evâhiri Şevvâl sene 1002. Şuhûdü’l-hâl: Mustafa Çavuş [b.] Murad, Mevlânâ Abdullah [b.] Mehmed el-imâm, Ahmed b. Veli, Murad b. Abdullah, Osman Bey b. İsmail el-cündî, Kılıç Bey [b.] Mehmed el-cündî, Kerim Çelebi [b.] Mehmed el-kâtib, Mehmed Çelebi b. Hamdi ve gayruhüm.