Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 177 Hüküm no: 179 Orijinal metin no: [41b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf Reis’in Matbah-ı âmire için Kefe’den alınan yağ tulumlarından bazılarının gemisi fırtınaya tutulduğundan zâyi olduğunu beyanı Oldur ki, bundan akdem mâl-ı pâdişâhî ile mahrûsa-i Kefe’den yağ alıp matbah-ı âmireye irsâl için me’mûr olan fahrü’l-akrân Derviş Çavuş b. Mehmed ve Hoca Ali nâm kimesneler meclis-i şer‘a Mehmed Reis b. Bâli nâm kimesneyi ihzâr ve mahzarında takrîr-i kelâm edip bundan akdem me’mûr olduğumuz üzre mahrûsa-i Kefe’den otuz dört tulum yağ alıp mezbûr Mehmed Reis ile Matbah-ı âmireye irsâl eylemiş idik. Hâlâ zikr olunan yağın cümlesi matbaha vâsıl olmamıştır, mîrî için taleb ederiz dediklerinde, gıbbe’s-suâl mezbûr Mehmed Reis cevâb verip fi’l-vâki‘ zikr olunan otuz dört tulum yağı mezbûrların yedlerinden Matbah-ı âmireye îsâl için kabz eylemiş idim. Lâkin sefîne ile Sakarya nâm mevzi‘ kurbuna geldikde fırtına vâki‘ olup sefînem helâk oldukda zikr olunan tulumlar deryâya düşüp ba‘dehû otuz tulumun geri deryâdan ihrâc edip zikr olunan yağı kabza me’mûr olan Abdülkerim nâm kapıcıya teslîm edip dört tulumu deryâdan çıkmayıp zâyi‘ olmuşdur dedikde mezbûr Abdülkerim dahi zikr olunan otuz tulum yağı merkūm Mehmed Reis yedinden Matbah-ı âmire’ye teslîm için me’mûr olduğun üzre kabz eylediğin bi’l-muvâcehe i‘tirâf etdikde, merkūmân Derviş Çavuş ve Hoca Ali mezkûr Mehmed Reis te‘addî etmediğine istihlâf etdiklerinde sâlifü’z-zikr Mehmed Reis bi vechin mine’l-vücûh te‘addî etmediğine yemîn billâh edip mâ vaka‘a bi’t-taleb ketb olundu. [Tahrîren] fî evâili Zilka‘de li sene isneteyn ve elf. Şuhûdü’l-hâl: Mustafa Bey [b.] Hüseyin es-silâhî, Bayram Bey b. Abdurrahman, Hüseyin b. Şaban, İbrahim b. Ramazan, Hasan b. Abdullah ve gayruhüm.