Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 181 Hüküm no: 185 Orijinal metin no: [42b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf b. Bûber’in yarı hissesini satın aldığı gemi bedeline el koyan Ahmed b. Ali ile sulh olması Mahrûsa-i Galata hâricinden Tophâne mahallâtından Bostanbaşı mahallesi ahâlîsinden Yusuf b. Bûber nâm Arab meclis-i şer‘-i şerîfe hâzır olup işbu râfi‘ü’l-kitâb Ahmed b. Ali nâm mellâh mahzarında takrîr-i kelâm edip bundan akdem İbrahim Çelebi nâm kimesneden çekelve dimekle ma‘rûf bir sefînenin nısf-ı şâyi‘ini iştirâk üzre iştirâ etmek için mezbûr Ahmed’e kendi mâlımdan dört bin akçe teslîm edip ba‘dehû mezbûr Ahmed nısf-ı mezkûru kendi mâlıyla nefsiçin iştirâ eylemeğin meblağ-ı mezkûru merkūm Ahmed’den taleb eylediğimde inkâr edip ben isbât sadedinde iken muslihûn tavassutuyla ıskāt-ı da‘vâ için merkūm Ahmed bana bin akçe teslîm etmeğin, ben dahi zikr olunan bin akçeyi mesfûr Ahmed yedinden kabz ve tesellüm edip husûs-ı mezbûra müte‘allik cemî‘-i da‘âvâdan rızâmla ferâğ eyledim. Eğer min ba‘d dahi da‘vâ edersem mesmû‘ olmaya dedikde mezbûr Yusuf’un kelâm-ı meşrûhunu sâlifü’z-zikr Ahmed vicâhen tasdîk ve şifâhen tahkīk edip mâ vaka‘a kayd olundu. Tahrîren fî 13 Zilka‘de sene 1002. Şuhûdü’l-hâl: Musa b. Abdullah, Mustafa b. Ali, Ahmed b. Mahmud, İshak b. Abdullah, Hacı Ahmed b. Mustafa, Mustafa b. Şükür, Mahmud b. Süleyman.