Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 180 Hüküm no: 184 Orijinal metin no: [42b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müderris Ali Efendi b. Abdürraûf’un satın aldığı eve Nesli Hatun’un müdâhalesinin önlenmesi Oldur ki, işbu râfi‘ü’l-kitâb fahrü’l-müderrisîn Mevlânâ Ali Efendi b. Abdürraûf meclis-i şer‘-i menî‘ü’l-erkâna Nesli bt. (...) [Reyhan?] Hâtun’u ihzâr ve mahzarında takrîr-i kelâm edip mahmiye-i Kostantıniyye mahallâtından Kızılminâre mahallesinde Acıçeşme mukābelesinde vâki‘ bir tarafı İsmail Çavuş b. Abdullah mülkü ve iki tarafı tarîk-i âm ve bir tarafı tarîk-i hâs ile mahdûd olan menzil bundan akdem diyâr-ı Mısriyye beylerinden fahrü’l-umerâ’i’l-kirâm Sinan Bey b. Abdüsselâm’ın mülk-i mahzı olup ba‘dehû merkūm Sinan Bey tarafından menzil-i mezkûru bey‘a ve kabz-ı semene vekâletin ba‘de’l-inkâr udûl-ı Müslimînden Sadi b. Ali el-müsta‘id ve el-Hâc Hasan b. Abdullah et-tâcir şehâdetleriyle isbât eden Hasan Bey b. Ali menzil-i mezkûru târih-i kitâb Cumâdelâhire’sinin yirmi üçüncü gününde yüz kırk bin akçeye bana bey‘-i bâtt-ı sahîh-i şer‘î ile bey‘ edip teslîm etdikden sonra mezbûre Nesli Hâtun ev kapısı içeriden mesdûd iken taşradan nerdübân ile menzil-i mezbûra girip benim tasarrufuma mâni‘ olur, suâl olunsun dedikde gıbbe’s-suâl mezkûre Nesli Hâtun cevâb verip fi’l-vâki‘ menzil-i mezkûr mukaddemâ sâlifü’z-zikr Sinan Bey’in mülk-i mahzı olup lâkin vekîl-i mezbûr Hasan Bey merkūm Ali Efendi’ye menzil-i mezkûru vekâlet-i meşrûhası hasebiyle bey‘ etdiği târihden mukaddem sâlifü’z-zikr Sinan Bey’in geri bey‘a vekîli olan Ömer Çavuş b. Ali menzil-i mezkûru bana yüz kırk beş bin akçeye bey‘ edip benim iştirâm târihi mezbûr Ali Efendi’nin iştirâsı târihinden mukaddemdir deyû sene seb‘a ve tis‘în ve tis‘a mi’e Rebî‘ulâhiri evâsıtıyla müverrah hüccet-i bey‘ ibrâz edip nazar olundukda hüccet-i merkūme mesfûr Ömer Çavuş’un mezkûre Nesli Hâtun’a vekâleten bey‘ini müştemile olup lâkin merkūm Ömer Çavuş’un bey‘a vekâleti hasm-ı şer‘î mahzarında sâbite olmayıp ve merkūm Ömer Çavuş ihzâr olunup suâl olundukda bey‘ini inkâr edip merkūme Nesli Hâtun’dan asl-ı tevkîle şâhid taleb olunup istimhâl etdikde mirâren imhâl olunup ityân-ı beyyineden aczi mukarrer olmağın cânib-i şer‘-i mutahhardan kasr-ı yede tenbîh olunup mâ hüve’l-vâki‘ bi’t-taleb ketb olunup yed-i tâlibe vaz‘ olundu. Tahrîren fî evâili Ramazâni’l-mübârek li sene isneteyn ve elf. Şuhûdü’l-hâl: Ali b. İskender eş-şeyh bi zâviye-i Kurşunlu Türbe, Mevlânâ İbrahim b. Ali el-müderris, Ali Bey b. Murad el-cündî, Mevlânâ Halil [b.] Mehmed el-kadı, Ali Çelebi el-imâm, Haydar Çavuş el-mübâşir, Mustafa Çelebi b. Hüseyin el-imâm, Mevlânâ Ahmed Efendi el-müderris, Hasan Çelebi b. Mustafa, İsmail [b.] Mustafa, Hüseyin Çelebi [b.] Ali el-imâm, Habib b. Abdullah, İsmail Çelebi b. Ali et-tâcir ve gayruhüm.