Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 185 Hüküm no: 192 Orijinal metin no: [43b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Salamon’un Ömer Çavuş’a olan borcunu vârisi David v. Avraham’ın ödediği Mahmiye-i Kostantıniyye mahallâtından Çakırağa mahallesinde sâkin fahrü’l-akrân Ömer Çavuş b. Hüseyin meclis-i şer‘-i şerîfe hâzır olup mahmiye-i mezkûre Yahudilerinden Kireoğlu dimekle ma‘rûf olup bundan akdem helâk olan Salamon nâm Yahudi’nin li-eb karındaşı ve vâris-i vâhidi olan David v. Avraham nâm Yahudi tarafından husûs-ı âti’z-zikre İbrahim Bey b. Abdullah el-bevvâb ve Rıdvan Bey b. Abdullah nâm kimesneler şehâdetleriyle vekâleti sâbite olan Yasef v. Avraham nâm Yahudi mahzarında takrîr-i kelâm edip hâlik-i mezbûr ile hayâtda iken nice mu‘âmele-i şer‘iyyemiz olup ba‘de küllî hesâb zimmetinde bin dört yüz akçe hakkım zuhûr etdikden sonra mezbûr Salamon helâk olup meblağ-ı merkūm uhdesinde bâkī kalmış idi. Hâlâ hâlik-i mezbûrun muhallefâtından meblağ-ı mersûmu vârisi David yedinden bi’t-tamâm alıp kabz edip hâlik-i mezkûr uhdesinde meblağ-ı merkūmdan bir akçe ve bir habbe hakkım bâkī kalmamışdır dedikde mukırr-ı mezkûrun ikrâr-ı meşrûhunu [44a] vekîl-i mesfûr vicâhen tasdîk ve şifâhen tahkīk edip mâ hüve’l-vâki‘ bi’t-taleb ketb olundu. Tahrîren fî evâsıtı Zilka‘de sene 1002. Şuhûdü’l-hâl: Mustafa Çavuş b. Hamza, Mustafa Çelebi b. Ali, İbrahim Bey b. Abdullah, Rıdvan b. Abdullah.