Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 184 Hüküm no: 191 Orijinal metin no: [43b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emine bt. Pîrî’nin Rıdvan Çavuş b. Abdullah’tan aldığı borç karşılığı kiraladığı evinin üç yıllık kirâ bedelinin borcundan mahsûbu Mahmiye-i Kostantıniyye mahallâtından el-Hâc Hamza mahallesinde sâkine Emine bt. Pîrî nâm hâtun meclis-i şer‘-i şerîfe hâzıra olup Dergâh-ı âlî çavuşlarından fahrü’l-akrân Rıdvan Çavuş b. Abdullah mahzarında takrîr-i kelâm edip bundan akdem mezbûr Rıdvan Çavuş’dan karz tarîkiyle yetmiş beş bin akçe alıp mahalle-i mezkûrede vâki‘ lede’l-ahâlî ma‘lûmetü’l-hudûd olan mülk menzilimi târih-i kitâbdan üç yıl mukaddem mezkûr Rıdvan Çavuş’a günde yirmişer akçeye icâreye verip bi’l-fi‘il menzil-i merkūmun üç yıllık ücreti mezkûr Rıdvan Çavuş uhdesinde yirmi bir bin altı yüz akçe olmuş idi. Hâlâ merkūm Rıdvan Çavuş zikr olunan menzil icâresinden uhdesinde hâsıl olan yirmi bir bin altı yüz akçeyi mezbûra benim cihet-i karzdan deynim olan yetmiş beş bin akçeden yirmi bir bin altı yüz akçeye benim rızâmla tutup, hâlâ merkūm Rıdvan Çavuş’a meblağ-ı mersûm yetmiş beş bin akçeden elli üç bin dört yüz akçe deyn uhdemde bâkī kalmışdır dedikde merkūm Rıdvan Çavuş dahi minvâl-i meşrûh üzre i‘tirâf ve mukırre-i mezbûrenin ikrâr-ı meşrûhun vicâhen ve şifâhen tasdîk ve tahkīk edip mâ hüve’l-vâki‘ kayd olundu. Tahrîren fî 19 min Zilka‘de sene 1002. Şuhûdü’l-hâl: Eyüb Efendi b. Hızır el-kadı, Seyyid Hasan b. Seyyid Mehmed, Mehmed Çelebi b. Hüseyin el-imâm, Mehmed b. Ali el-mü’ezzin, İbrahim b. Mehmed, Mehmed b. Eymir, Gazanfer b. Abdullah, Abdülbâkī Çelebi b. Sinan Ağa.