Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 187 Hüküm no: 197 Orijinal metin no: [44b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Salamon’un Mirahor Sinan Ağa Vakfı’na olan borcunun bir kısmını vârisi David v. Avraham’ın ödediği Oldur ki, mahmiye-i İstanbul Yahudilerinden Kireoğlu dimekle ma‘rûf olup bundan akdem helâk olan Salamon nâm Yahudi’nin li-eb karındaşı ve vâris-i vâhidi olan David v. Avraham nâm Yahudi tarafından husûs-ı âti’z-zikre İbrahim Bey b. Abdullah el-bevvâbü’s-sultânî ve Rıdvan Bey b. Abdullah nâm kimesneler şehâdetleriyle vekâleti sâbite olan Yasef v. Avraham nâm Yahudi meclis-i şer‘-i şerîfe hâzır olup mahmiye-i mezbûrede merhûm Mirahor Sinan Ağa Vakfı’na hâlâ mütevellî olan Mustafa Çavuş b. Hamza mahzarında takrîr-i kelâm edip vakf-ı mezbûr mâlından hâlik-i mezkûr zimmetinde yüz otuz bin akçe karzdan ve on iki bin dokuz yüz akçe çuka bahâsından cem‘an yüz kırk iki bin dokuz yüz akçe olup ba‘dehû meblağ-ı mezkûrun otuz üç bin akçesin mütevellî-i mezbûra teslîm edip hâlâ hâlik-i mezbûr zimmetinde meblağ-ı merkūmdan yüz dokuz bin dokuz yüz akçe bâkī kalmışdır dedikde vekîl-i mezbûrun kelâm-ı meşrûhun mütevellî-i mezkûr vicâhen tasdîk ve şifâhen tahkīk edip mâ hüve’l-vâki‘ bi’t-taleb ketb olundu. [Tahrîren] fî evâsıtı Zilka‘de [sene 1002]. Şuhûdü’l-hâl: Mustafa Çavuş [b.] Ali, Ömer Çavuş b. Hüseyin, Rıdvan Bey b. Abdullah, Mehmed Çelebi el-kâtib ve gayruhüm.