Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 187 Hüküm no: 196 Orijinal metin no: [44b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Salamon’un Hüseyin Çelebi Evkâfı’na olan borcunun bir kısmını vârisi David v. Avraham’ın ödediği Mahmiye-i İstanbul Yahudilerinden Kireoğlu dimekle ma‘rûf olup bundan akdem helâk olan Salamon nâm Yahudi’nin li-eb karındaşı ve vâris-i vâhidi olan David v. Avraham nâm Yahudi tarafından husûs-ı âti’z-zikre İbrahim Bey b. Abdullah el-bevvâbü’s-sultânî ve Rıdvan Bey b. Abdullah şehâdetleriyle vekâleti sâbite olan Yasef v. Avraham nâm Yahudi meclis-i şer‘-i şerîfe hâzır olup mahmiye-i mezbûrede bezzâzistân kethüdâsı merhûm Hüseyin Çelebi Evkāfı’na hâlâ mütevellî olan Ömer Çavuş b. Hüseyin mahzarında takrîr-i kelâm edip hâlik-i mezbûr hayâtda iken vakf-ı mezbûr mâlından karz tarîkiyle yüz seksen bin akçe alıp mütevellî-i sâbık Hüsrev yedinde müte‘addid esbâb rehin vaz‘ edip ba‘dehû mezbûr Salamon helâk oldukda zikr olunan rehin izn-i şer‘le bey‘ olunup bahâsı vakf için ahz olundukda, rehn-i mezbûr yetmiş bin akçesine vefâ etmeyip hâlik-i mezbûr uhdesinde vakf-ı mezbûrun yetmiş bin akçesi bâkī kalmış idi. Hâlâ bâkī-i mezbûrun beş bin altı yüz akçesin dahi vâris-i mezkûr David hâlik-i merkūmun muhallefâtından mütevellî-i mezbûr Ömer Çavuş’a teslîm edip meblağ-ı merkūmdan hâlâ hâlik-i mezbûr uhdesinde altmış dört bin dört yüz akçe bâkī kalmışdır dedikde mütevellî-i mezbûr Ömer Çavuş bi’l-muvâcehe meblağ-ı merkūm beş bin altı yüz akçeyi vakf için kabz ve tesellümün i‘tirâf ve vekîl-i mezbûru kelâm-ı meşrûhunda vicâhen tasdîk ve şifâhen tahkīk edip mâ hüve’l-vâki‘ bi’t-taleb ketb olundu. Tahrîren fî evâsıtı Zilka‘deti’l-mübâreke sene 1002. Şuhûdü’l-hâl: Es-Sâbikūn fî suhufi’l-ûlâ.