Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 189 Hüküm no: 201 Orijinal metin no: [45a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Honaz kasabasından Abdullah Çelebi ve kardeşi Lütfullah’ın babalarını öldürdükleri için şikayetçi oldukları Hüseyin Çavuş b. Hüdaverdi, kardeşi İbrahim ve Yusuf b. Bulamaç’ın halka zulüm ettiklerinin tesbiti Vilâyet-i Anadolu’da Honaz nâm kasaba ahâlîsinden işbu râfi‘u’l-kitâb Mevlânâ Abdullah Çelebi b. el-Hâc Ferhad el-müderris ve karındaşı Lütfullah nâm kimesneler Dîvân-ı refî‘ü’l-bünyâna kasaba-i mezbûre ahâlîsinden Hüseyin Çavuş b. Hüdâverdi ve karındaşı İbrahim nâm kadı ve Yusuf b. Bulamaç nâm kimesneleri ihzâr ve mahzarlarında takrîr-i kelâm edip bundan akdem kasaba-i mezbûrede gece ile babam mezbûr el-Hâc Ferhad ile ziyâfetten eve gelirken mezbûrûn Hüseyin Çavuş ve İbrahim kadı ve Yusuf birkaç nefer yoldaşlarıyla yolumuz basıp babamı âlet-i harble zulmen katl edip beni dahi katl etmek istediklerinde ben firâr etmekle ellerinden güçle halâs oldum, mezbûrlar bize ziyâde hayf u zulm eylemişlerdir ve bundan mâ‘adâ dâimâ şer‘ ve fesâdlarından ahâlî-i vilâyet dahi âciz olmuşlardır. Hâlâ hasb-i hâlleri hakīkat-i hâle vâkıf bî-garaz ahâlî-i vilâyetden suâl olunsun deyû mezbûrların zulm ve te‘addîlerin müştemil arzlar ve mahzar ibrâz edip suâl olundukda hakīkat-i hâle vâkıf bî-garaz Müslimînden Mevlânâ Ahmed Efendi b. Celal el-kadı ve Veli Efendi b. Hüseyin el-kadı ve Mehmed Efendi b. Ahmed el-kadı ve es-Seyyid Bilal Efendi b. es-Seyyid Sinan el-kadı ve Ömer Efendi b. Mustafa el-kadı ve Mehmed Efendi b. İlmelik? el-kadı ve Ahmed Efendi el-kadı ve Yakub Efendi el-müderris ve Abdullah Efendi b. el-Hâc Murad el-mülâzım ve Muslihiddin b. el-Hâc Yardım el-mülâzım ve sâirleri bi’l-muvâcehe hâzırûn olup fi’l-vâki‘ mezbûrların evlerinde mahbesleri olup nice fukarâyı bi gayrı hakkın habs edip nicesine beş altı bahâsına at ve katır ve deve ve sâir esbâbların satıp ve nicesinden diğer bahâsının rub‘ ve humusu mikdârına at ve katır ve sâir esbâbların alıp hilâf-ı şer‘-i şerîf nice vaz‘ları zâhir ve bâhir ve zulm ve te‘addîleri mukarrer ve vâki‘dir. Ale’l-husûs mezbûr Yusuf kuttâ‘-ı tarîkden olmağla meşhûrdur ve bu arzlar ve mahzarda mezkûr olan husûs hak ve vâki‘dir, gayra zararları müte‘addiddir deyû alâ tarîki’ş-şehâde ihbâr etdiklerinde mâ hüve’l-vâki‘ bi’t-taleb ketb olundu. Tahrîren fî 23 min Zilka‘de sene 1002. Şuhûdü’l-hâl: Muharrem Efendi b. Hoca Maruf el-müderris, Sunullah Efendi b. İlmelik? el-kadı, Mahmud Efendi el-kadı, Şaban Çelebi b. İskender, Hasan Çelebi b. Pîr Ahmed, Molla Hüsam b. Bilal.