Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 200 Hüküm no: 210 Orijinal metin no: [49a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Saliha Hanım’ın vefat eden babası Ömer Paşa’nın Halep’de Ferhad Çavuş’a yaptırdığı han için harcanan paranın sarfiyat muhasebesini uygun görmesi Oldur ki, bundan [akdem] Atabe-i aliyyede nişâncı iken vefât eden merhûm ve mağfûrun-leh Ömer Paşa’nın sulbiye kızı ve vârisesi olan kıdvetü’l-muvakkarât usvetü’l-muhadderât Sâliha Hanım tarafından husûs-ı âti’z-zikre vekîl-i şer‘î olan Mevlânâ Mehmed Efendi b. İsmail el-müderris meclis-i şer‘-i şerîfe hâzır olup mahrûsa-i Haleb mukāta‘acısı olan kıdvetü’l-a‘yân Kurd Efendi b. Hamza ve Dergâh-ı âlî çavuşlarından fahrü’l-akrân Ferhad Çavuş b. Abdullah mahzarlarında takrîr-i kelâm edip bundan akdem merhûm-ı mezbûr hayâtda iken mahrûsa-i Haleb’de bir hân binâ etmek için merkūm Ferhad Çavuş’u binâ emîni nasb edip ve müşârun-ileyh Kurd Efendi’ye dahi mahrûsa-i mezbûrede olan havâssı mahsûlünü voyvodalarından alıp merkūm Ferhad Çavuş’a teslîm edip hân-ı mezbûr ol mahsûl ile binâ olunmasın sipâriş etmiş idi. Hâlâ hân-ı mezbûr binâ olunup lâkin zikr olunan binâya ne mikdâr meblağ harc olunmuşdur, suâl olunup takrîrleri tahrîr olunmasın taleb ederin dedikde, gıbbe’s-suâl mezbûr Kurd Efendi bi’l-muvâcehe cevâb verip mukaddemâ hân-ı mezbûru binâya mübâşeret etmedin, hânın yerinde olan toprağı nakl için merkūm-ı mezbûrun havâssı mahsûlünden her biri altmış Osmânî hesâbı üzre beş bin flori harc u sarf edip merkūm dahi hayâtda iken muhâsebesin verip ba‘dehû binâya mübâşeret olundukdan sonra yine hesâb-ı merkūm üzre on altı bin üç yüz otuz sekiz buçuk altın havâss-ı mezbûre mahsûlünden ve iki bin yedi yüz on dokuz altın kendi mâlımdan merkūm Ferhad Çavuş’a binâ için teslîm edip zikr olunan toprak nakline harc olunan beş bin floriden gayrı binâ-i mezkûra merkūm Ferhad Çavuş yedinden cem‘an on dokuz bin elli yedi buçuk altın harc u sarf olunmuşdur dedikde, mesfûr Ferhad Çavuş dahi zikr olunan on dokuz bin elli yedi buçuk altını merkūm Kurd Efendi yedinden bi’t-tamâm kabz ve tesellüm edip binâ-i mezkûra cem‘an harc u sarf ettiğin ikrâr ve i‘tirâf ve merkūm Kurd Efendi’yi kelâm-ı meşrûhunda bi’l-muvâcehe tasdîk ve tahkīk etdikde tarafeynden sâdır olan kelâm vekîl-i mezbûr talebiyle ketb olundu. Fî 25 Zilka‘de sene 1002. Şuhûdü’l-hâl: Kasım Çavuş [b.] Ebîbekir, Ahmed el-cündî, Ahmed Bey [b.] Mahmud ez-za‘îm, Osman Bey [b.] Mehmed ez-za‘îm, Mustafa Çelebi [b.] Ebîbekir ve gayruhüm.