Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 200 Hüküm no: 209 Orijinal metin no: [48b-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aydın Bey b. Abdullah’ın muhallefâtından Beytülmâle intikal eden evin müzâyede ile Râbia bt. Ali’ye satıldığı Bundan akdem sâkin olduğu Edirne kazâsı tevâbi‘inden Ulûfeciler karyesinde fevt olan on sekizinci yayalar bölüğünden merhûm râcil Aydın Bey b. Abdullah’ın muhallefâtına vâzı‘-ı yed olan, Atebe-i aliyye ve südde-i seniyyede vâki‘ râcilin zümresine mahsûs Beytülmâlin emîni fahrü’l-a‘yân Mustafa Subaşı b. Osman meclis-i şer‘-i şerîfde hâzır olup, âtiyyü’z-zikr menzili Râbia bt. Ali nâm hâtun kıbelinden menzili iştirâya vekâleti Mehmed Bey b. Ömer el-cündî ve hayyât-ı sultânî Rıdvan b. Abdullah’ın şehâdetleri ile sâbit olan fahrü’l-akrân Mehmed Çavuş b. el-Hâc Mustafa’ya emânet-i mahkiyyesi hasebiyle bey‘-i bâtt-ı sahîh ile bey‘ ettiğini ikrâr ve i‘tirâf etti. Vekîl-i mezbûr da vekâlet-i mahkiyyesi hasebiyle, müteveffâ-i mesfûrdan beytülmâle intikāl eden, Dârü’s-saltanati’s-seniyye mahmiye-i Kostantıniyye mahallâtından Karabaş mahallesinde vâki‘, tahtânî iki beyti, üzerinde oda bulunan ahırı, önünde küçük bir oda bulunan su kuyusunu, fırını, helâyı, avluyu ve damlalık ta‘bîr edilen yeri hâvî bulunan, bir taraftan Kara Mehmed Ağa b. Ali mülkü, diğer taraftan Kasım b. Ali mülkü, öteki taraftan Hasan b. Pîrî mülkü ile mahdûd olan cemî‘-i menzili cümle tevâbi‘ ve levâhıkı ile râyicü’l-vakt yirmi beş bin iki yüz akçe semen-i mu‘ayyen-i makbûz ile ve îcâb kabûl ve teslîm tesellümü hâvî bey‘-i bâtt-ı sahîh ile iştirâ etti. İşbu mubâya‘a, menzil-i mezbûrun mirâren beyne’t-tâlibîn ve’r-râgıbîn müzâyede olunup semen-i mezbûrla müşterî üzerinde karâr eylemesinden sonra vâki‘ oldu. Vâki‘ ikrâr, müvekkil-i mezbûr tarafından vicâhen ve şifâhen tasdîk edildi. Cerâ zâlike ve hurrire fi’t-târihi’l-mezbûr. Şuhûdü’l-hâl: Es-Sâbikūn