Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 211 Hüküm no: 219 Orijinal metin no: [52a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmi bt. Osman Bey’in satın aldığı câriyenin hürriyetini ispat etmesi üzerine Rıdvan b. Abdullah’tan parasını geri alması Mahmiye-i Kostantıniyye mahallâtından Cerrâhbaşı mahallesinde sâkine Ümmî nâm hâtunun babası ve husûs-ı âti’z-zikre vekîl-i şer‘îsi olan Osman Bey b. Abdullah el-bevvâbü’s-sultânî meclis-i şer‘-i şerîfe hâzır olup işbu râfi‘ü’l-kitâb el-Hâc Rıdvan b. Abdullah nâm kimesne mahzarında takrîr-i kelâm edip bundan akdem müvekkilem mezbûre Ümmî Hâtun sâlifü’z-zikr el-Hâc Rıdvan’dan on bir bin nakd-i râyic fi’l-vakt fıddî akçeye orta boylu kara gözlü açık kaşlı buğday enli Mülâyim bt. Abdullah nâm bir câriye iştirâ ve tesellüm edip meblağ-ı merkūmu bâyi‘-i mezkûr Rıdvan’a bi’t-tamâm teslîm etdikden sonra câriye-i mezkûre merkūme Ümmî yedinde iken udûl-ı Müslimînden Yahya Bey b. Abdullah el-cündî ve Nasuh Bey b. Hüseyin el-cündî şehâdetleriyle hürriyetin isbât edip kıbel-i şer‘den sebîli tahliye olunmağın, bâyi‘-i mezbûr el-Hâc Rıdvan’dan semen-i merkūma mürâca‘at lâzım gelmiş idi. Hâlâ meblağ-ı mezbûru merkūm el-Hâc Rıdvan yedinden müvekkileme îsâl için alıp bi’t-tamâm vekâleten kabz ve tesellüm eyledim deyû tav‘an ikrâr ve i‘tirâf etdikde mukırr-ı mezbûrun ikrâr-ı meşrûhunu sâlifü’z-zikr Hacı Rıdvan vicâhen tasdîk ve şifâhen tahkīk edip mâ hüve’l-vâki‘ bi’t-taleb ketb olundu. Tahrîren fî 15 min Zilhicce sene 1002. Şuhûdü’l-hâl: Ahmed b. Hüseyin, Hasan b. Abdullah, Abdülganî b. Nezir.