Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 211 Hüküm no: 220 Orijinal metin no: [52a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çavuş’un Gebze Mustafa Paşa Vakfı’na ait Katrin’in vergilerini iltizâma alan Mehmed b. Hüseyin’e kefil olması Mahmiye-i Kostantıniyye’de vâki‘ Saray-ı Atîk-i Sultânî kapısı kurbunda sâkin Dergâh-ı âlî çavuşlarından fahrü’l-akrân Mehmed Çavuş b. Abdullah meclis-i şer‘-i şerîfe hâzır olup kasaba-i Gebze’de imâreti olan merhûm ve mağfûrun-leh Mustafa Paşa Evkāfı’na hâlâ mütevellî olan işbu râfi‘ü’l-kitâb Ferruh Bey b. Abdullah ve evkāf-ı mezbûreden olup Yenişehir ve Karaferye kazâlarında vâki‘ Katrin cibâyetin mütevellî-i mezbûrdan târih-i kitâbda iltizâm eden Mehmed b. Hüseyin nâm kimesne mahzarında takrîr-i kelâm edip mesfûr Mehmed mütevellî-i merkūmdan zikr olunan Katrin cibâyetin iltizâm etmeğin mütevellî-i mezbûr talebiyle mezkûr Mehmed’in nefsine ve uhdesinde mâl-ı vakf zuhûr edip edâdan aczi olursa zuhûr eden mâl-ı vakfa emr u kabûlü hâviye kefâlet ile kefîl oldum deyû tav‘an ikrâr ve i‘tirâf etdikde, mezbûr Mehmed dahi mukırr-ı mezbûru vicâhen ve şifâhen tasdîk ve tahkīk edip mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâbi‘ aşer min Zilhicce sene isneteyn ve elf. Şuhûdü’l-hâl: Osman Efendi b. Davud el-müderris, Memi b. Hüseyin, Feridun Bey b. Abdullah, Hüsrev Çavuş b. Abdullah, Hasan Çelebi b. Murad Efendi, Mehmed Çelebi b. el-Hâc Mehmed el-kâtib, Veli b. Hüsam, Mehmed b. Abdullah.