Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 233 Hüküm no: 251 Orijinal metin no: [60a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe Hatun’un mehir alacağını ölen kocasının terekesinden tahsil etmesi Dergâh-ı âlî yayabaşılarından mahmiye-i Kostantıniyye’de Çavuş Mescidi mahallesinde sâkin iken bundan akdem vefât eden merhûm Ahmed Subaşı b. Abdullah’ın zevcesi ve vârisesi olan Ayşe Hâtun’un babası ve husûs-ı âti’z-zikre vekîl-i şer‘îsi olan Halil b. Musa nâm kimesne meclis-i şer‘-i şerîfe hâzır olup hâlâ Dergâh-ı âlî yeniçerileri beytülmâl emîni olup müteveffâ-yı mezkûrun muhallefâtına vâzı‘u’l-yed olan işbu râfi‘ü’l-kitâb fahrü’l-akrân Mustafa Subaşı b. Osman mahzarında takrîr-i kelâm edip müvekkilem mezkûre Ayşe zevci müteveffâ-yı mezbûr Ahmed Subaşı uhdesinde mehr-i müeccelinden olan on beş bin akçe hakkın ve verâseti hasebiyle kendiye intikāl eden rub‘ hissesin emîn-i müşârun-ileyh yedinde mazbût olan muhallefâtından alıp bi’t-tamâm kabz edip husûs-ı mezbûra müte‘allik emîn-i mezkûr ile kat‘â alâkası kalmamışdır deyû tav‘an ikrâr eyledikde, vekîl-i mezbûrun ikrâr-ı meşrûhun emîn-i mesfûr vicâhen tasdîk edip kayd olundu. Fî selhi Zilhicce sene 1003. Şuhûdü’l-hâl: Hasan [b.] Abdullah, Ahmed [b.] Hüseyin, Mehmed [b.] Abdullah ve gayruhüm.