Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 234 Hüküm no: 252 Orijinal metin no: [60a-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Hamza, Ömer b. Hamza, Mahmud b. Hamza ve Cennet bt. Mehmed’in muhallefâtı zabt edilen Mehmed b. Hamza’nın vârisleri olduğu Her ikisi de vilâyet-i Anadolu-i ma‘mûrede vâki‘ Pazar suyu kazâsı ahâlîsinden olan, udûlden Mahmud b. Resûl el-mu‘temed ve Hamza b. Hüseyin nâm kimesneler Dîvân-ı âlî’de, emâcid-i mükerremîn-i mufahhamîn defterdârlar huzûrunda hâzırân olup, elân Dârü’s-saltanati’s-seniyye mahmiye-i Kostantıniyye’de vâki‘ Beytülmâl-i hâssın emîni olan kıdvetü’l-a‘yân Abdullah Çavuş b. Hızır mahzarında, Ahmed b. Hamza’nın kendi nefsinden asâleten ve Ömer b. Hamza’nın kezâ kendi nefsinden asâleten, Cennet bt. Mehmed nâm sagīreye kıbel-i şerden mansûb vasî olarak vesâyeten ve Mahmud b. Hamza nâm kardeşi kıbelinden vekîl olarak vekâleten ve Nârin bt. Mustafa nâm hâtun kıbelinden vekîl olarak vekâleten sâdır olan da‘vâ-i sahîha-i şer‘iyyede gıbbe’l-istişhâdi’ş-şer‘î şöyle şehâdet ettiler ki, Ahmed ve müvekkil Mahmud ve vekîl Ömer, kazâ-i mezbûr ahâlîsinden olup bundan akdem Mustafa Reis’in sefînesinde fevt olan ve zabt edilen muhallefâtı semeninden emîn-i mezkûr Mehmed Çavuş ma‘rifetiyle Atebe-i aliyyeye gönderilen defter-i muhâsebe mûcibince, mahmiye-i Galata’da vâki‘ Beytülmâl-i hâssın emîni mezkûr Mehmed Çavuş yediyle râyicü’l-vakt beş bin yetmiş dokuz akçe-i Osmânîsi 1002 senesi Receb-i mürecceb ayının on birinci günü Hızâne-i âmireye teslîm edilen merhûm Mehmed b. Hamza’nın ana-baba bir kardeşleri ve vârisleridir. Zira babaları ve müteveffâ-i mezbûrun babası Hamza b. Musa’dır; anneleri Teslime bt. Mehmed’dir. Sagīre-i mezkûre ise müteveffâ-i mesfûrun sulbiye kızı ve vârisidir. Müvekkile-i mezbûre Nârin Hâtun ise vefâtı anında taht-ı nikâhındaki zevcesi ve vârisidir. Verâseti bunlara âiddir; bunlardan başka vâris ve terekesine müstehak kimesne ma‘lûmumuz değildir. Zamânın kazâ-i mezbûr kadısı Mevlâna Mustafa b. Ali’den sâdır olan, ünvânıyla mu‘anven, hâtemiyle mahtûm, mazmûnu bu hüccetin mazmûnuyla mutâbık hüccetin kadı-i mezbûrun meclisinden vârid olmasından sonra ve onun meclisinden sudûru, onun hücceti olduğu onun mührü ile memhûr olduğu, isimleri zeyl-i kitâbda mastûr olan Mevlâna Yakub b. Yusuf el-kādî ve Mustafa b. İbrahim el-müderrisîn şehâdetleri ile sâbit olmasından sonra, şehâdetleri ba‘de ri‘âyet-i şerâiti’l-kabûl inde’ş-şer‘ makbûl ve mûteber olmağın mûcibince hükmedildi. Cerâ zâlike ve hurrire fî 4 min Muharremi’l-harâm sene selâse ve elf. Şuhûdü’l-hâl: Hüseyin b. Memi, Mehmed Çelebi [b.] Ali, Ahmed b. Hüseyin, Süleyman Çavuş [b.] Abdullah, Ahmed b. Hüseyin, Gülâbî b. Hasan