Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 238 Hüküm no: 258 Orijinal metin no: [61b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nesli bt. Derviş’in Fâtıma Sultan Vakfı’na olan borcunu ödemesine karşılık rehininin iade edilmesi Mahmiye-i Kostantıniyye’de vâki‘ merhûme Fâtıma Sultan bt. Ferhad Paşa Vakfı’na hâlâ mütevellî olan fahrü’l-a‘yân Mustafa Bey b. Sinan el-bevvâbü’s-sultânî meclis-i şer‘a hâzır olup, Aksaray mahallesinde sâkine Nesli bt. Derviş nâm hâtun tarafından husûs-ı âti’z-zikre Rıdvan b. Abdullah ve Zamâne bt. Abdullah ve Aynülhayât bt. Abdullah şehâdetleriyle vekâleti sâbite olan Emine bt. Hüseyin nâm hâtun mahzarında takrîr-i kelâm edip mütevellîsi olduğum vakf-ı mezbûr mâlından müvekkilem merkūme Nesli Hâtun zimmetinde bundan akdem altmış bin akçe cihet-i karzdan ve altı bin akçe çuka bahâsından cem‘an altmış altı bin akçe olup hâlâ meblağ-ı merkūmu mezbûre Nesli Hâtun’un teslîme vekîli olan mesfûre Emine Hâtun yedinden vakf-ı mezbûr için alıp bi’t-tamâm kabz ve tesellüm edip ve mezbûre Nesli Hâtun’un benim yedimde rehn-i makbûz olan yüz aded incisin vekîli mezbûreye teslîm edip, husûs-ı mesfûra müte‘allik merkūme Nesli Hâtun’[la] kat‘â alâkam kalmadı dedikde, mütevellî-i mezbûrun ikrâr-ı meşrûhunu vekîl-i mezbûre vicâhen tasdîk ve şifâhen tahkīk edip mâ hüve’l-vâki‘ ketb olundu. Tahrîren fî 15 min Muharremi’l-harâm sene selâse ve elf. Şuhûdü’l-hâl: Perviz Çavuş b. Abdullah el-mübâşir, Ali b. Abdullah, Abdülganî b. Nezir, Mehmed b. Abdullah.