Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 239 Hüküm no: 259 Orijinal metin no: [61b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mezid Çavuş b. Timur’un kendisine borçlu iken ölen yeniçerilerden Mahmud b. Abdullah’ın muhallefâtından bir miktar alacağının kaldığı Oldur ki, Dergâh-ı âlî çavuşlarından Mezid Çavuş b. Timur meclis-i şer‘-i şerîfe hâzır olup hâlâ Dergâh-ı sa‘âdet-destgâh yeniçerileri beytülmâlı emîni olup otuz altıncı cemâ‘atinden Mahmud b. Abdullah nâm müteveffânın muhallefâtına vâzı‘u’l-yed olan fahrü’l-a‘yân Mustafa Subaşı b. Osman mahzarında ikrâr ve i‘tirâf edip bundan akdem mâl-ı mudârabeden müteveffâ-yı mezkûrun yedinde elli üç bin akçe hakkım olup mezbûr Mahmud vefât ettikden sonra meblağ-ı mezbûr uhdesinde bâkī kalıp husûs-ı mezbûr vech-i meşrûh üzre idiğin bundan akdem şuhûd-ı udûl ile isbât etmiş idim. Hâlâ emîn-i müşârun-ileyh yedinde müteveffâ-yı mezkûrun mazbûta olan muhallefâtından meblağ-ı mezbûrun kırk dört bin beş yüz akçesin alıp kabz edip sekiz bin beş yüz akçe hakkım bâkī kalmışdır dedikde, mukırr-ı mezbûrun ikrâr-ı meşrûhun emîn-i mesfûr tasdîk edip kayd olundu. Fî 8 Muharrem sene m[ezbûr]. Şuhûdü’l-hâl: Hasan b. Abdullah, Süleyman [b.] Mahmud, Mustafa [b.] Abdullah er-râcil, Halil [b.] İskender, Abdi b. Abdullah er-râcil, Mustafa [b.] Abdullah er-râcil.