Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 239 Hüküm no: 260 Orijinal metin no: [61b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. İskender’in hür olduğu sâbit olan câriye için ödediği parasının iadesi Oldur ki, mahmiye-i Kostantıniyye’de Ayasofya-i kebîr kurbunda sâkine Fâtıma bt. İskender nâm hâtun meclis-i şer‘-i şerîfe hâssa sakalardan Hasan b. Abdullah nâm kimesneyi ihzâr ve mahzarında takrîr-i kelâm edip bundan akdem mezbûr Hasan Bey’den dokuz bin dört yüz yetmiş akçeye orta boylu kara gözlü açık kaşlı buğday enli Mülâyim bt. Abdullah nâm bir câriye iştirâ edip meblağ-ı mezbûru mezkûr Hasan’a teslîm edip ba‘dehû câriye-i mezkûreyi ben dahi el-Hâc Rıdvan nâm kimesneye bey‘ edip ol dahi âhara bey‘ edip ba‘dehû câriye-i mezkûre şuhûd-ı udûl ile hürriyetin zevi’l-yed-i münkir mahzarında isbât edip kıbel-i şer‘den sebîli tahliye olunmağın, mezbûr el-Hâc Rıdvan câriye-i mezkûrenin kıymetin benden ahz eylemiş idi. Hâlâ zikr olunan dokuz bin dört yüz yetmiş akçeyi ben dahi mezbûr Hasan’dan taleb ederin, gıbbe’s-suâl, mezbûr Hasan fi’l-vâki‘ zikr olunan câriyeyi ben mesfûre Fâtıma Hâtun’a bey‘, meblağ-ı mezbûru bi’t-tamâm kabz eylemiş idim. Lâkin câriye-i merkūmeyi Esma bt. Hüsrev nâm hâtun tarafından vekâleten bey‘ edip semenini dahi müvekkileme teslîm eylemiş idim dedikde, mezbûr Hasan’ın vech-i meşrûh üzre olan kelâmı merkūme Fâtıma Hâtun talebi ile ketb olundu. Tahrîren fî 15 min Muharremi’l-harâm sene selâse ve elf. Şuhûdü’l-hâl: Mustafa Çavuş el-mübâşir, Bayezid b. Abdullah et-tabbâhu’s-sultânî, Hacı Hürrem b. Abdullah, Hacı Mustafa b. Şaban.