Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 257 Hüküm no: 269 Orijinal metin no: [66b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Veli Efendi b. Mehmed’in köle satışından el-Hâc Cafer b. Receb’den alacaklı olduğu Mahrûsa-i Edirne sâkinlerinden işbu râfi‘ü’l-kitâb Mevlânâ Veli Efendi b. Mehmed el-kadı meclis-i şer‘-i şerîfe kasaba-i İpsala ahâlîsinden el-Hâc Cafer b. Receb nâm kimesneyi ihzâr ve mahzarında takrîr-i kelâm edip bundan akdem mezbûr el-Hâc Cafer’den beş bin iki yüz akçeye orta boylu elâ gözlü açık kaşlı eğri boyunlu Rûsiyyü’l-asl Hasan b. Abdullah nâm bir gulâm iştirâ edip meblağ-ı mezbûru merkūm el-Hâc Cafer’e bi’t-tamâm teslîm edip ba‘dehû gulâm-ı mezkûr benim yedimde iken el-Hâc Mehmed b. el-Hâc Ahmed nâm kimesne şuhûd-ı udûl ile mülkünden ibâk ettiğini isbât edip gulâm-ı mezbûru benim yedimden ahz edip semen-i mesfûra mürâca‘at lâzım olmağın hâlâ meblağ-ı mezbûru merkūm el-Hâc Cafer’den taleb ederin dedikde, gıbbe’s-suâl mezbûr el-Hâc Cafer, fi’l-vâki‘ gulâm-ı mezbûru mesfûr Veli Efendi’ye beş bin iki yüz akçeye bey‘ edip semen-i merkūmu kabz ve tesellüm ettiğini tav‘an ikrâr ve i‘tirâf ettikde, mezkûr el-Hâc Cafer’in ikrâr-ı meşrûhu mezbûr Veli Efendi talebiyle ketb olundu. Tahrîren fî 15 min Muharremi’l-harâm sene selâse ve elf. Şuhûdü’l-hâl: Ahmed b. Mustafa, Ahmed b. Abdullah, Hasan b. Abdullah, Hızır el-muhzır, Abdülganî b. Nezir.