Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 262 Hüküm no: 275 Orijinal metin no: [68a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Receb’in Zeytun b. Hızır’a olan borcunu vekili Yahya b. İlyas’a ödediği beyanının tesbiti Vilâyet-i Anadolu’da Kahta nâm kasaba ahâlîsinden işbu râfi‘ü’l-kitâb Zeytun b. Hızır nâm kimesne meclis-i şer‘-i şerîfe hâzır olup, Hısnımansur kazâsına tâbi‘ Zen nâm kasaba ahâlîsinden Ali b. Receb nâm kimesne mahzarında takrîr-i kelâm edip, târih-i kitâbdan dört yıl mukaddem kendi mâlımdan mezbûr Ali yedinde her biri sekizer Osmânî hesâbı üzre otuz bin akçelik şâhî emânet vaz‘ etmiş idim. Hâlâ meblağ-ı mezbûru taleb ederin dedikde, gıbbe’s-suâl mezbûr Ali cevâb verip fi’l-hakīka merkūm Zeytun târih-i mezkûrda benim yedimde otuz bin akçelik şâhî emânet vaz‘ eylemiş idi, lâkin ba‘dehû Yahya b. İlyas nâm kimesne mezbûr Zeytun tarafından kabza vekîlin deyû meblağ-ı mezbûru bi’t-tamâm ahz edip benim yedimde meblağ-ı merkūmdan bir akçe bâkī kalmadı dedikde, mukırr-ı mezbûr Ali’nin vech-i meşrûh üzre olan kelâmı merkūm Zeytun talebi ile ketb olundu. Tahrîren fî evâhiri Muharremi’l-harâm sene 1003. Şuhûdü’l-hâl: Hüseyin b. Sultan Hoca, Rıdvan Çavuş b. Abdullah, Eyneverdi b. Mirza, Ahmed b. Hüseyin, Hasan b. Halil, Süleyman b. Mahmud.