Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 261 Hüküm no: 274 Orijinal metin no: [68a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Filibe’de bir bölümü boş bir vakıf arsasına taşan vakıf hanın yıkılmasıyla ilgili davada tarafların kira bedeli karşılığı anlaştığı Oldur ki, vilâyet-i Rumeli muzâfâtından Filibe nâm kasabada evkāfı olan merhûm Şah Sultan Vakfı’na hâlâ mütevellî olan fahrü’l-a‘yân Hüseyin Ağa b. (….) vekîl olup vekâleti fahrü’l-akrân Seyfullah Çelebi b. Vefa ve Mustafa Çelebi (…..) şehâdetleri ile sâbite olan vakf-ı mezbûrun kâtibi olan Mahmud Çelebi b. İlyas meclis-i şer‘-i şerîfe hâzır olup, kasaba-i mezbûrede merhûm el-Hâc Pîrî Vakfı’na evlâdından mütevellîye olan Kaya Hâtun’un oğlu ve husûs-ı mezbûra vekîl-i şer‘îsi olan Mustafa b. Mehmed mahzarında takrîr-i kelâm edip bundan akdem kasaba-i merkūmede mezbûre Şah Sultan Vakfı’ndan binâ olunup lede’l-ahâlî ma‘lûmetü’l-hudûd olan bu hânın binâsından bir mikdârı sene seb‘a ve semânîn ve tis‘a mi’e Muharremi gurresinde mezbûr el-Hâc Pîrî Vakfı’ndan olan dört bâb odaların arzı üzre vâki‘ olup ba‘dehû mütevellîye-i merkūme Kaya Hâtun arz-ı mezkûreyi vakf için tevliyeten da‘vâ edip zikr olunan hâtunun merkūm el-Hâc Pîrî Vakfı’ndan olan dört bâb odalar yerinde vâki‘ olan binâsının kal‘ı lâzım olup ve binâ-i mezbûr kal‘ olunduğu takdîr üzre cânib-i vakfa küllî zarar müterettib olup lâkin mezbûr el-Hâc Pîrî Vakfı cânibine zikr olunan dört bâb odaların arzıyçün târih-i mezbûrdan her sene müşârun-ileyhâ Şah Sultan Vakfı’ndan dört yüz akçe icâre verilmek iki cânibe dahi enfa‘ ve evlâ olmağın, cânibeynin rızâlarıyla ve re’y-i hâkim ile ve bî-garaz Müslimîn tahmînleriyle mezbûre Şah Sultan Vakfı’ndan zikr olunan dört bâb odaların arzıyçün târih-i mezkûrdan her sene dört yüz akçe icâre takdîr olunmuşdur. Min ba‘d dahi ücret-i merkūm sâl be sâl cânib-i vakfa edâ oluna dedikde, kâtib-i mezbûr Mahmud’un vech-i meşrûh üzre olan kelâmın vekîl-i mezbûr Mustafa vicâhen tasdîk ve şifâhen tahkīk edip, mâ hüve’l-vâki‘ kayd olundu. [derkenâr:] 987 Muharremi gurresinde icâre. Fî gurreti Saferi’l-hayr sene-i m[ezbûr]. Şuhûdü’l-hâl: Mevlânâ Ahmed Efendi b. Mahmud, Mevlânâ Mehmed b. el-Hâc Mehmed, Hüsrev Çavuş [b.] Abdülmennân, Hasan b. Abdullah.