Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 264 Hüküm no: 278 Orijinal metin no: [68b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Bey b. Abdülmennân’ın vefat eden yeniçeri Aydın Beşe’den alacaklı olduğu Oldur ki, Dergâh-ı âlî müteferrikalarından işbu râfi‘ü’l-kitâb mefharü’l-a‘yân Hasan Bey b. Abdülmennân meclis-i şer‘-i menî‘ü’l-erkâna mahmiye-i Kostantıniyye mahallâtından Karabaş mahallesinde sâkin iken vefât eden Aydın Beşe b. Sinan nâm yeniçerinin zevc[es]i ve vârisesi olup kendi tarafından asîl ve müteveffâ-yı mezbûrun sulbiye kızı ve vârisesi olan Safiye Hâtun tarafından husûs-ı âti’z-zikre vekîl-i şer‘î olan Râbia bt. Ali nâm hâtunu ihzâr ve mahzarında takrîr-i kelâm edip müteveffâ-yı mezbûr Aydın Beşe zimmetinde cihet-i karzdan otuz dört bin akçe hakkım olup mezkûr Aydın Beşe hayâtda iken meblağ-ı mezbûru bana edâ etmeden vefât etmeğin meblağ-ı merkūm uhdesinde bâkī kalmışdır. Hâlâ mezbûretân Râbia ve Safiye yedlerinde mazbûta olan terekesinden taleb ederin dedikde, gıbbe’s-suâl mezbûre Râbia, fi’l-hakīka müdde‘î-i mezbûr Hasan Bey’in müteveffâ-yı merkūm Aydın Beşe zimmetinde cihet-i karzdan otuz dört bin akçe hakkı olup ba‘de’l-vefât zimmetinde bâkī kalmışdır deyû asâleten ve vekâleten ikrâr ve i‘tirâf ve mezbûr Hasan Bey’i kelâm-ı meşrûhunda tasdîk ve tahkīk etmeğin, tarafeynden sâdır olan kelâm vukū‘u üzre bi’t-taleb ketb olunup tâlibe verildi. Fî evâili Saferi’l-hayr sene 1003. Şuhûdü’l-hâl: Mehmed Çavuş [b.] el-Hâc Mustafa, Ahmed b. Hüseyin, Hızır b. Abdullah, Aydın Çavuş [b.] Abdullah, Hasan b. Abdullah, Mustafa Subaşı [b.] Osman ve gayruhüm.