Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 266 Hüküm no: 282 Orijinal metin no: [69a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pervane b. Abdullah’ın karısı Ayşe bt. Abdullah’tan kendisine intikal eden hisseye razı olması Mahrûsa-i Galata’ya tâbi‘ kasaba-i Beşiktaş mahallâtından merhûm Yahya Efendi mahallesinde sâkine iken bundan akdem vefât edip cihet-i verâseti zevcine ve beytülmâla munhasıra olan merhûme Ayşe bt. Abdullah nâm hâtunun zevci ve vârisi olan Pervâne b. Abdullah nâm kimesne Dîvân-ı refî‘ü’l-bünyâna hâzır olup defterdârân-ı zevi’l-ihtirâm huzûrlarında hâlâ mahrûsa-i Galata’da beytülmâl-ı hâs emîni olan kıdvetü’l-a‘yân el-Hâc Mehmed Çavuş b. Abdülmennân mahzarında takrîr-i kelâm edip bundan akdem zevcem müteveffât-ı merkūme Ayşe Hâtun hâl-i hayâtında tasarrufât-ı şer‘iyyesi nâfize iken uhdemde mezbûrenin mehr-i müeccelinden hakkı olan otuz bin akçenin yirmi dokuz bin akçesin bana hibe ve temlîke ve mahalle-i mezkûrede vâki‘ etrâf-ı erba‘ası mefharü’l-ulemâi’l-kirâm Mevlânâ Abdullah Efendi b. Abdülkerim Efendi ve Mehmed b. Mahmud ve Ahmed b. Mahmud mülklerine ve deryâya ve tarîk-i âma muttasıl hâricî ve dâhilî fevkānî ve tahtânî buyût-ı müte‘addide ve hamam ve bağçe ve dört mevzi‘de bi’r-i mâ ve muhavvatayı müştemil olan mülk menzilin dahi yine bana hibe ve temlîk için Mahmud b. Yusuf nâm kimesneyi tevkîl ve el-Hâc Yusuf b. Mehmed ve Ahmed b. Abdullah nâm kimesneleri istişhâd edip ba‘dehû mezbûr Mahmud vekâleti hasebiyle zikr olunan otuz bin akçe mehr-i müeccelinden yirmi dokuz bin akçeyi ve menzil-i mezkûru bana hibe ve temlîk edip ile’l-ân menzil-i mezkûra ben mutasarrıf iken hâlâ emîn-i mezkûr zikr olunan otuz bin akçe ve menzil, müteveffât-ı merkūmenin muhallefâtındandır deyû meblağ-ı mezbûrdan ve menzil-i mezkûrdan cânib-i beytülmâla âide olan hisseye ta‘arruz eder deyû sene-i elf Rebî‘ulâhiri evâsıtıyla müverrah vekîl-i mezbûrun hibesin hâviye hüccet ibrâz edip suâl olundukda, emîn-i mezkûr inkâr edip, hüccet-i merkūme[de] mastûr olan vekâlet şâhidleri sicill-i mahfûzda mukayyed olan sûret-i hüccetde olmayıp âhar kimesne olup hüccet-i merkūme ihtilâlden hâlî olmayıp mezbûr Pervâne’den asl-ı kaziyyeye şuhûd-ı udûl taleb olundukda beyyine-i âdile ikāmetinden aczine i‘tirâf edip zevciyyeti hasebiyle kendiye âide olan hisse-i şer‘iyyesine râzî oldukda, vâki‘-i hâl gıbbe’s-suâl ketb olundu. Tahrîren fî 25 min Muharremi’l-harâm sene selâse ve elf. Şuhûdü’l-hâl: Mehmed Çavuş b. Osman, İsmail Bey b. Abdullah el-cündî, el-Hâc Piyâle b. Abdullah, Hasan b. Abdullah, Mahmud Çavuş b. Kasım, Cafer b. Abdullah, Ahmed b. Hüseyin ve gayruhüm.