Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 267 Hüküm no: 283 Orijinal metin no: [69b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çavuş’un sattığı kölenin hür olduğunu ispatı üzerine iade ettiği bedelini, Esirci Mehmed’den talep ettiği Dergâh-ı âlî çavuşlarından işbu râfi‘ü’l-kitâb kıdvetü’l-a‘yân el-Hâc Mehmed Çavuş b. Abdullah nâm kimesne meclis-i şer‘-i menî‘ü’l-erkâna el-Hâc Mehmed b. Yahya nâm esirciyi ihzâr ve mahzarında takrîr-i kelâm edip bundan akdem mezbûr Esirci Mehmed işbu orta boylu sarışın gök elâ gözlü çatık kaşlı Boğdaniyyü’l-asl Ali nâm gulâmı mülkiyyet üzre bana bey‘ edip ben dahi mezbûra semen-i ma‘lûmunu teslîm edip gulâm-ı mezbûru kabz eyledikden sonra ben dahi gulâm-ı mezbûru âhara bey‘ edip ba‘dehû mezbûr âhar yedinde şuhûd-ı udûl ile hürriyetini isbât edip sebîli tahliye olunmağın, gulâm-ı mezbûru ben bey‘ eylediğim kimesne kıymet-i ma‘lûmesin benden ahz eylemeğin ben dahi gulâm-ı mezbûru bana bey‘ eden mezbûr Ali dahi meclis-i şer‘a bi’l-muvâcehe hâzır olup suâl olundukda, mezbûr Esirci Mehmed sâlifü’z-zikr Ali’ye işâret ve ta‘ayyün edip fi’l-hakīka sâbıkda işbu sıfâtla mevsûf olan gulâmı mezbûr el-Hâc Mehmed Çavuş’a ben bey‘ edip semen-i ma‘lûmunu kabz eylemiş idim. Lâkin gulâm-ı mezbûr Ali âhar yedinde hürriyetin isbât edip sebîli tahliye olunduğu ma‘lûmum değildir dedikde, mezbûr Esirci Mehmed’in kelâm-ı meşrûhu merkūm el-Hâc Mehmed Çavuş talebi ile ketb olunup yedine vaz‘ olundu. Tahrîren fî 9 Saferü’l-muzaffer sene selâse ve elf. Şuhûdü’l-hâl: Abdülganî b. Nezir, Dadak b. Memi, Abdülfettah b. Seyfullah el-kadı, Hamza b. İsmail, Mehmed b. Şeyh Nazar el-hatîb, Enbiyâ b. Nureddin.