Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 268 Hüküm no: 285 Orijinal metin no: [69b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin b. Hızır’ın borcunu ödemediği için hapse atılmışken salıverilmesine kefil olduğu firari İbrahim b. Abdullah’ı bulup getirmesi gerektiği Dergâh-ı âlî çavuşlarından fahrü’l-akrân Mehmed Çavuş b. Mustafa meclis-i şer‘-i şerîfe hâzır olup [ve] Ahmed b. Abdullah nâm muhzır muvâcehesinde takrîr-i kelâm edip bundan akdem İbrahim b. Abdullah nâm acemi oğlanı uhdesinde kırk iki bin akçe lâzımü’l-edâ hakkım zuhûr eyledikde, cânib-i şer‘-i mutahhardan muhzır-ı mezbûra zikr olunan hakkımı merkūm İbrahim’den alıver deyû tenbîh olunup havâle ta‘yîn olunup hasmım habs olundukdan sonra mezbûr Ahmed benim rızâm yok iken merkūm İbrahim’i habsden ıtlâk etmeğin, hâlâ mezbûr İbrahim firâr etmişdir suâl olunsun dedikde, gıbbe’s-suâl mezbûr Ahmed i‘tirâf edip fi’l-vâki‘ husûs-ı mezbûr beyân olunduğu üzredir, lâkin mezbûr İbrahim’i inde’l-mütâlebe ihzâr için işbu râfi‘ü’l-kitâb Hüseyin b. Hızır kefîl olmağın ıtlâk eyledim dedikde, mezbûr Hüseyin dahi bi’l-muvâcehe hâzır olup suâl olundukda, fi’l-hakīka mezbûr İbrahim’i inde’l-mütâlebe ihzâr için nefsine ben kefîl olmuş idim deyû tav‘an ikrâr ve i‘tirâf edip ve mezbûr Hüseyin’in dahi nefsine Kâtib Şemseddin mahallesinden Ali b. Hüseyin kefîl oldukdan sonra cânib-i şer‘-i şerîfden kefîl-i mezkûr Hüseyin’e firârî sâlifü’z-zikr İbrahim’i tefahhus edip ihzâr etmek için tenbîh ve te’kîd üzre mâ hüve’l-vâki‘ bi’t-taleb ketb olundu. Tahrîren fî evâili Safer sene selâse ve elf. Şuhûdü’l-hâl: Hasan b. Abdullah, Ahmed Çelebi el-nakkāş, Ahmed b. Abdullah, Bahşi Halîfe el-mü’ezzin, (…).