Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 269 Hüküm no: 286 Orijinal metin no: [70a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Anbarcılardan Rum Mehmed’in arkadaşları Arslan ve Macar Rıdvan’la birlikte Paroh Yahudi’yi öldürdüklerini itiraf etmesi Mahmiye-i İstanbul Yahudilerinden olup husûs-ı âti’z-zikre kendi tarafından asîl ve anası Cerasvile nâm Yahudi’ye tarafından ve yine li-ebeveyn kız karındaşları Arhondibola ve Hirsola taraflarından vekîl olan işbu râfi‘ü’l-kitâb Şemoyil v. Kalav nâm Yahudi meclis-i şer‘-i şerîfe, hâlâ mahmiye-i mezkûrede subaşı olan kıdvetü’l-a‘yân Rıdvan Çavuş b. Abdülmennân ve yeniçeriler muhzırbaşısı olan umdetü’l-akrân Ali Ağa b. Abdülmennân mübâşeretiyle hâssa anbarcılardan Rum Mehmed demekle ma‘rûf şahsı ihzâr ve mahzarında takrîr-i kelâm edip bundan akdem mezbûr Rum Mehmed yine anbarcılardan Arslan ve baltacılardan Macar Rıdvan yoldaşlarıyla li-ebeveyn karındaşım olup verâseti bize ve zevcine munhasıra olan Paroh nâm Yahudi’yi odun anbarı içinde tenhâlayıp katl eylemişler. Hâlâ mezbûr Rum Mehmed’den suâl olunup takrîri tahrîr olunmak taleb ederin dedikde, gıbbe’s-suâl mezbûr Rum Mehmed ikrâr ve i‘tirâf edip fi’l-hakīka sâlifü’z-zikr Paroh Yahudi’yi odun anbarı içinde tenhâlayıp hâricden içeri kimesne girmesin deyû ben anbar kapusın bekleyip yoldaşlarım mezbûrân Arslan ve Macar Rıdvan mezbûr Yahudi’yi sicim ile boğup ba‘dehû meyyitin iletip bir helâya bırakdık, maktûl-i mezkûr Yahudi’yi bu minvâl üzre katl eyledik dedikde, mezbûr Rum Mehmed’in kelâm-ı meşrûhu mesfûr Şemoyil talebiyle ketb olundu. Tahrîren fî 13 min Safer sene selâse ve elf. Şuhûdü’l-hâl: Ramazan b. Abdullah el-mütevellî, Mehmed Çavuş b. Abdullah, Hasan Bey b. Abdullah, Habib Bey b. Abdullah, Bâli b. Hasan, Mustafa b. Pîrî Ağa, Hüseyin b. Hasan odabaşı, Mahmud b. Abdullah er-re’îs, el-Hâc Halil b. Mehmed, Murad b. Abdullah.