Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 281 Hüküm no: 300 Orijinal metin no: [73a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Bey’in menzilinden Mahmud b. Ömer’in uzaklaştırılarak vârislerine terk etmesi Mahmiye-i Kostantıniyye’de Zeyrek mahallesinde sâkine işbu sâhibetü’l-kitâb Hümâ bt. Mustafa Bey nâm hâtun tarafından ve yine mezbûre Hümâ’nın li-ebeveyn kız karındaşı olup bundan akdem vefât eden Fâtıma’nın sadrî oğlu Mahmud ve sadriyye kızı Kâmile taraflarından husûs-ı âti’l-beyâna vekîl olup, vekâlet-i mahkiyyesi hasm-ı câhid mahzarında nehc-i şer‘î üzre sâbite olan mefharü’s-sülehâ Mevlânâ Mehmed b. eş-Şeyh Nazar el-hatîb meclis-i şer‘-i menî‘ü’l-erkâna menzil-i âti’z-zikre hâlâ vâzı‘u’l-yed olan Mahmud b. Ömer nâm kimesneyi ihzâr ve mahzarında takrîr-i kelâm edip, müvekkilem mezbûre Hümâ Hâtun’un babası mezbûr Mustafa Bey târih-i kitâbdan otuz yıl mukaddem vefât eyledikde cümle terekesinden mahmiye-i mezbûre ebvâbından Cebealikapısı hâricinde vâki‘ yedi bâb büyût-ı ulviye ve serdâb ve kenîf ve muhavvatayı müştemil bir tarafı mefharü’l-emâcid Mehmed Ağa mülküne ve bir tarafı Ferhad Ağa mülküne ve bir tarafı tarîk-i âma ve bir tarafı bahre muttasıl olan mülk menzili sulbiye kızları olup ile’l-ân da‘vâdan memnû‘a olan müvekkilem mezkûre Hümâ ile kız karındaşı mezbûre Fâtıma’ya intikāl edip ba‘dehû mezbûre Fâtıma vefât etmekle menzil-i mezbûrdan hisse-i mu‘ayyenesi mukaddemâ sagīrler olup hâlâ kebîrler olmağla da‘vâya salâhı olup yine beni husûs-ı mezbûra tevkîl eden mezbûrân Mahmud ve Kâmile’ye intikāl edip menzil-i mezkûr vech-i meşrûh üzre mezbûrların mülk-i mevrûsları iken hâlâ menzil-i mezbûru mezkûr Mahmud mülkiyyet üzre tasarruf edip mezbûrların tasarruflarına mâni‘ olur, suâl olunup cânib-i şer‘-i mutahhardan men‘ olunmasın taleb ederin dedikde, gıbbe’s-suâl mezbûr Mahmud cevâb verip, fi’l-hakīka menzil-i mezbûr sâbıkda mezbûrlara müteveffâ-yı merkūmdan irs-i şer‘î ile intikāl edip lâkin mezbûretân Hümâ ve Fâtıma menzil-i merkūmu âhara bey‘ için ammîleri el-Hâc Memi nâm kimesneyi tevkîl etmeğin, mezbûr el-Hâc Memi menzil-i mezkûru vekâleten Mîralem Rıdvan Ağa nâm kimesneye bey‘ ve tesellüm ve semenini kabz edip ba‘dehû bu minvâl üzre menzil-i mezbûr mülkiyyet üzre bey‘ olunup hâlâ benim yedimde iştirâ tarîki üzre karâr etmişdir, menzil-i mezbûr bu minvâl üzre benim mülk-i müşterâmdır ve kavlimi musaddık yedimde hüccetlerim vardır dedikde, vekîl-i mezbûr inkâr etmeğin mezbûretân Hümâ ve Fâtıma mukaddemâ ammîleri merkūm el-Hâc Memi’yi menzil-i mezkûru bey‘a tevkîllerine merkūm Mahmud’dan taleb beyyine taleb olundukda, ikāmet-i beyyine için istimhâl edip mirâren imhâl olunup, ba‘dehû beyyine-i âdile ikāmetinden mezbûr Mahmud’un aczi mukarrer olup mezbûrları istihlâf etmeğin, mezbûre Hümâ ve müteveffât-ı merkūme Fâtıma’nın vârisleri mezbûrân Mahmud ve Kâmile ihzâr olunup nehc-i şer‘î üzre bi’l-muvâcehe alâ haddihî tahlîf olunup yemîn billâh etdiklerinde, mezbûr Mahmud cânib-i şer‘-i mutahhardan kasr-ı yede tenbîh olunup, vâki‘-i hâl gıbbe’s-suâl ketb olundu. Tahrîren fî evâili Safer sene selâse ve elf. Şuhûdü’l-hâl: Es-Sâbikūn.