Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 283 Hüküm no: 303 Orijinal metin no: [73b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Beytülmâl emini Abdullah Çavuş’un tasarrufunda olan menzilin Fâtıma bt. Mirza’ya ait olduğunun tesbiti Oldur ki, mahmiye-i Kostantıniyye mahallâtından Nurludede mahallesinde sâkine işbu râfi‘atü’l-kitâb Fâtıma bt. Mirza nâm hâtun dîvân-ı refî‘ü’l-bünyâna hâzıra olup, defterdârân-ı zevi’l-ihtirâm huzûrlarında hâlâ mahmiye-i mezkûrede beytülmâl-ı hâs emîni olan kıdvetü’l-a‘yân Abdullah Çavuş b. Hızır mahzarında takrîr-i kelâm edip sadrî oğlum Yusuf b. Süleyman târih-i kitâbdan sekiz yıl mukaddem vefât eyledikde, cümle terekesinden mahalle-i mezkûrede vâki‘ iki beyt-i süflâ ve bir çardak ve bir selâmlık ve ıstabl ve bi’r-i mâ ve kenîf ve muhavvatayı müştemil bir tarafı merhûm Hasan Bâli Vakfı’na ve bir tarafı merhûme Hümâ Hâtun Vakfı’na ve bir tarafı Davud Bey mülküne ve bir tarafı tarîk-i âma muttasıl olan mülk menzili sulbî sagīr oğlu ve vârisi olan Mehmed’e ve bana intikāl edip ile’l-ân menzil-i mezkûrda sâkin olup hâlâ sagīr-i mezbûr Mehmed vefât edip benden gayrı vârisi olmayıp ben cedde-i sahîhası olmağla verâseti farzan ve redden bana munhasıra olmağın, sagīr-i mezkûrun menzil-i mezkûrdan hisse-i ma‘lûmesi şer‘le bana intikāl etmekle menzil-i mezbûr cemî‘an benim mülk-i mevrûsum olmuş iken emîn-i merkūm Abdullah Çavuş sagīr-i mezbûr Mehmed’in babası merkūm Yusuf senin sadrî oğlun değildir, beslemendir, menzil-i mezkûr cânib-i beytülmâla râci‘dir deyû menzil-i mezbûra ta‘arruz eder, suâl olunup cânib-i şer‘den men‘ olunmasın taleb ederin dedikde, gıbbe’s-suâl emîn-i mezkûr müdde‘iye-i merkūme Fâtıma’nın verâsetin inkâr edip istişhâd olundukda, ahâlî-i mahalleden muhtâr-ı cemâ‘at olan udûl-i Müslimînden Mevlânâ Musa b. Ahmed el-imâm ve el-Hâc Ali b. Ahmed el-mü’ezzin ve Hasan Bey [b.] Abdullah ve Davud Bey [b.] Abdullah el-mü’ezzin es-sultânî ve Cafer Bey [b.] Abdullah el-cündî ve Mahmud Çavuş b. Abdullah nâm kimesneler ve sâirleri li ecli’ş-şehâde hâzırûn olup fi’l-vâki‘ sâbıkan menzil-i mezkûrun mâliki olan Yusuf b. Süleyman müdde‘iye-i merkūme Fâtıma’nın sadrî oğlu olup menzil-i mezkûr mülkünde iken târih-i mezbûrda vefât etdikde menzil-i mezbûr sulbî sagīr oğlu mezbûr Mehmed’e ve anası merkūme Fâtıma’ya intikāl edip ve hâlâ sagīr-i mezbûr Mehmed vefât edip gayrı vârisi olmamağla menzil-i mezbûrdan hisse-i ma‘lûmesin farzan ve redden cedde-i sahîhası merkūme Fâtıma’ya intikāl edip, hâlâ menzil-i mezkûrun cümlesi merkūme Fâtıma’nın bu minvâl üzre mülküdür, biz bu husûsa şâhidleriz şehâdet dahi ederiz dediklerinde, mezbûrûnun şehâdetleri ba‘de’t-ta‘dîl hayyiz-i kabûlde vâkı‘a olmağın, emîn-i mezkûr menzil-i mesfûra ta‘arruzdan men‘ olunup, mâ vaka‘a kayd olundu. Fî evâili Rebî‘ilâhir sene 1003. Şuhûdü’l-hâl: Cafer Bey [b.] Abdullah el-cündî, Mehmed Çavuş [b.] Abdullah, Hacı Ali [b.] Ahmed el-hayyâtü’s-sultânî, Ali b. Hayran er-râcil, Receb [b.] Ahmed el-mütevellî, Ali b. Mustafa el-cündî.