Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 284 Hüküm no: 304 Orijinal metin no: [74a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şaban Reis b. Hüsam’ın Mahmud b. Pîr’e olan borç iddiasında tarafların beyanının kaydı Oldur ki, mahrûsa-i Bursa ahâlîsinden işbu râfi‘ü’l-kitâb Mahmud b. Pîr nâm kimesne meclis-i şer‘-i şerîfe Şaban Reis b. Hüsam nâm kimesneyi ihzâr ve mahzarında takrîr-i kelâm edip târih-i kitâbdan üç yıl mukaddem mezbûr Şaban Reis Boğdan voyvodası olan Andon Voyvoda zimmetinde seksen bin akçe hakkım vardır, andan sen alasın deyû benim otuz sekiz bin akçem alıp yedime mezbûr voyvoda nâmına bir mahtûm tezkire verip ba‘dehû ben Boğdan’da meblağ-ı mezbûru merkūm Andon’dan taleb eylediğimde, tezkire-i mezbûre müzevverdir deyû bana zikr olunan meblağı teslîm etmeyip, hâlâ akçem mezbûr Şaban uhdesinde bâkīdir taleb ederin dedikde, gıbbe’s-suâl mezbûr Şaban cevâb verip, benim mezbûr Mahmud’dan alıp merkūm Andon’dan havâle eylediğim akçe yirmi bin akçe idi, otuz sekiz bin [değil] idi, lâkin yine zikr olunan yirmi bin akçeyi târih-i kitâbdan bir yıl mukaddem İstanbul’da Kebeciler Hânı’nda mezbûr Mahmud’a bi’t-tamâm teslîm etmiş idim deyû zikr olunan otuz sekiz bin akçenin yirmi bin akçesin mezbûr Mahmud yedinden kabzına mu‘terif oldukda, mezbûr Şaban’dan sâdır olan kelâm mesfûr Mahmud talebiyle ketb olundu. Fî selhi Saferi’l-hayr sene 1003. Şuhûdü’l-hâl: Süleyman [b.] Mahmud, Behrâm [b.] Abdullah, Mehmed Efendi el-hatîb ve gayruhüm.