Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 286 Hüküm no: 306 Orijinal metin no: [74a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rüstem Paşa kızı Ayşe Sultan’ın Yahudi Burgosu [Koca Sinan’daki] köyündeki emlâk ve tarlalarının tasarruf hakkını Ahmed Paşa’dan olan oğlu Abdurrahman Bey’e devretmesi Seyyidetü’l-muhadderât iklîletü’l-muhassenât aliyyetü’z-zât safiyyetü’s-sıfât celîletü’l-mikdâr cemîletü’l-âsâr Âişetü’d-devrân Fâtımatü’z-zamân hazret-i Ayşe Sultan bt. el-merhûm el-mebrûr el-vâsıl ilâ rahmeti rabbihi’l-gafûr Rüstem Paşa b. Abdüşşekûr taraflarından bey‘ ve tefvîz-i âti’l-beyâna vekîl olup vekâlet-i mahkiyyesi nehc-i şer‘î üzre Haydar Ağa b. Abdurrahman ve Osman Ağa b. Abdülmennân şehâdetleriyle sâbite olan kıdvetü’l-emâsil ve’l-eşbâh Mehmed Ağa b. Abdullah meclis-i şer‘-i refî‘ü’l-bünyâna hâzır olup müşârun-ileyhâ Ayşe Sultan’ın mahdûm-ı nebîlleri olan emîr-i celîl usvetü’l-mehâdîmi’l-kirâm kıdvetü’l-ümerâ’i’l-fihâm mefharü erbâbi’l-ikbâl umdetü ashâbi’l-câh ve’l-celâl Abdurrahman Bey b. el-merhûm en-nâil ilâ rahmeti’l-kayyum Ahmed Paşa taraflarından yine iştirâ ve tefevvuze vekîl olup vekâlet-i mahkiyyesi nehc-i ma‘hûd üzre Seyyid Halil b. Yahya ve el-Hâc Mehmed b. Abdullah şehâdetleriyle sâbite olan fahrü’l-akrân Süleyman Çavuş b. Yahya mahzarında tav‘an ikrâr [ve] i‘tirâf edip, müvekkilem müşârun-ileyhâ Ayşe Sultan’ın ile’l-ân taht-ı tasarrufunda olup havâss-ı Kostantıniyye kazâsına tâbi‘ Yahudi Burgosu demekle ma‘rûfe karyede vâki‘ altı bâb çiftçiler odası ve bir öküz ahuru ve bir samanlık ve bir at ahuru ve bir çeşme ve harâba müşrif bir hamam ve harâb evleri müştemil bir tarafı sadrazam vezîr-i ekrem Sinan Paşa hazretleri mülküne ve iki tarafı tarîk-i âm ve bir tarafı arz-ı hâliyeye muttasıl mülk menzilin içinde el-ân mevcûd olup mâ beynimizde ma‘lûm olan [74b] âlet-i çift ve öküzler ve sâir hayvânât ile vekâleten sâlifü’z-zikr Süleyman Çavuş’a müvekkili için yüz altmış bin nakd-i râyic fi’l-vakt fıddî-i Osmânî akçeye bey‘-i bâtt-ı sahîh ile bey‘ edip, bunlardan mâ‘adâ yine karye-i mezbûre sınırında Havuzlu bostan altında vâki‘ bir tarafı vâdiye ve üç tarafı Kiryaki nâm zimmî mezra‘asına ve tarîk-i âma muttasıl bir kıt‘a çayır ve tarla ve yine etrâf-ı erba‘ası İlyas nâm yeniçeri ve İstimadi ve Papa Manol nâm zimmîler mezra‘asına ve tarîk-i âma muttasıl bir kıt‘a tarla ve Nifoz nâm mevzi‘ kurbunda vâki‘ etrâf-ı erba‘ası Sofyanos ve Dimitri ve Papa Manol mezra‘alarına muttasıl bir kıt‘a tarla ve yine etrâf-ı erba‘ası vâdiye ve Dimitri ve Kiryaki nâm zimmîler mezra‘asına ve tarîk-i âma muttasıl bir kıt‘a tarla ve yine menzil-i mezbûr kurbunda vâki‘ etrâfı sâlifü’z-zikr Sinan Paşa hazretleri mezra‘asına ve Danyel nâm zimmî mezra‘asına ve tarîk-i âma muttasıl bir kıt‘a tarla ve yine bir tarafı müşârun-ileyh Sinan Paşa hazretleri mezra‘asına ve üç tarafı tarîk-i âma muttasıl bir kıt‘a tarla ve yine etrâfı İbrahim Bey mezra‘asına ve Papa Manol ve Todori mezra‘alarına ve tarîk-i âma muttasıl bir kıt‘a tarla ve yine etrâfı İlyas nâm yeniçeri ve Papa Manol ve Nikola nâm zimmîler mezra‘asına ve tarîk-i âma muttasıl bir kıt‘a tarla ve yine zikr olunan Havuzlu bostanın üstünde vâki‘ etrâf-ı erba‘ası mezbûr İlyas Yeniçeri ve Kasab Yorgi mezra‘asına ve tarîk-i âma muttasıl bir kıt‘a karıklı tarla ve yine etrâf-ı erba‘ası Kasab Yorgi ve diğer Yorgi ve Papa Manol ve Vasil nâm zimmîler mezra‘asına muttasıl bir kıt‘a tarla ve yine bir tarafı zikr olunan karıklı tarlaya ve üç tarafı tarîk-i âma muttasıl bir kıt‘a tarla işbu hudûd ile mahdûd olan on bir kıt‘a mezra‘anın dahi hakk-ı tasarrufun sâhib-i arz ma‘rifetiyle yine vekîl-i mezbûra kırk bin nakd-i râyic fi’l-vakt akçeye tefvîz edip zikr olunan bey‘ ve tefvîz mukābelesinde cemî‘an iki yüz bin nakid akçeyi müvekkilem müşârun-ileyhâ Ayşe Sultan’a îsâl için sâlifü’z-zikr Abdurrahman Bey kıbelinden iştirâ ve tefevvuze vekîl olan mezkûr Süleyman Çavuş yedinden bi’t-tamâm kabz ve tesellüm eyledim. Min ba‘d müvekkil-i müşârun-ileyh Abdurrahman Bey zikr olunan emlâk ve mezâri‘a mutasarrıf ola dedikde, mukırr-ı mezbûrun ikrâr-ı meşrûhun vekîl-i merkūm Süleyman Çavuş vicâhen tasdîk ve şifâhen tahkīk edip, vâki‘-i hâl gıbbe’s-suâl ketb olunup yed-i tâlibe vaz‘ olundu. Fî 8 min Rebî‘ilevvel sene selâse ve elf. Şuhûdü’l-hâl: Ali Kethüdâ b. Abdülmennân, Hürrem Ağa b. Abdurrahman, Haydar Ağa b. Abdüşşekûr, Mehmed b. Abdullah el-cündî, el-Hâc Mehmed b. Abdülmüteâl, Ahmed Bey b. Abdullah, Hâfız Mehmed ve gayruhüm.