Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 287 Hüküm no: 307 Orijinal metin no: [74b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kamer Hatun bt. Yunus’un menzilini satın alıp vakıf olduğu için bedelini ödemeyen Mehmed Çelebi’nin menzilin mülk olduğunun tesbiti üzerine bedelini ödemesi gerektiği Menzil vakfiyetden mülke hükm olundu. Oldur ki, mahmiye-i Kostantıniyye mahallâtından Aksaray’da Alembey mahallesinde sâkine işbu râfi‘atü’l-kitâb Kamer Hâtun bt. Yunus tarafından husûs-ı âti’z-zikre Mehmed Bey b. Davud ve İbrahim b. Abdullah şehâdetleriyle vekâleti sâbite olan Mevlânâ Mustafa b. Mehmed el-müsta‘id meclis-i şer‘-i şerîfe hâzır olup hâlâ Dergâh-ı âlî bevvâbları kâtibi olan fahrü’l-a‘yân Mehmed Çelebi b. Ali mahzarında takrîr-i kelâm edip müvekkilem mezbûre Kamer bundan akdem mahalle-i mezbûrede vâki‘ bir tarafı Sinan Çelebi Vakfı’na ve bir tarafı Gülendam Hâtun mülküne ve bir tarafı İsmihân bt. Ali mülküne ve tarîk-i âma muttasıl olan mülk menzilin merkūm Mehmed Çelebi’ye altmış bin akçeye bey‘-i bâtt ile bey‘ edip meblağ-ı mezbûr mezkûr Mehmed Çelebi uhdesinde bâkī kalmışdır, hâlâ vekâleten taleb ederin dedikde, gıbbe’s-suâl mezbûr Mehmed cevâb verip, fi’l-vâki‘ menzil-i mezkûru müvekkile-i mezbûre Kamer’den altmış bin akçeye iştirâ etmişdim. Lâkin menzil-i merkūmu mezbûre Kamer bana bey‘den evvel evlâdına sonra utekāsına sonra Medîne-i Münevvere fukarâsına vakf edip ve Medîne-i Münevvere Evkāfı defterine kayd dahi olunmuş, menzil-i mezbûr bu minvâl üzre vakf olucak, bey‘ sahîh değildir deyû meblağ-ı mezbûru teslîminden imtinâ‘ etdikde, vekîl-i mezkûr cevâb verip, fi’l-vâki‘ sâbıkda mezbûr Kamer menzil-i merkūmu vakf ettim deyû Mehmed nâm kimesneyi tescîl için vekîl nasb edip, lâkin vekîl-i mezbûr meclis-i hâkime varmayıp Medîne-i Münevvere Evkāfı defterine kayd ettirip ve menzil-i mezbûr teslîm-i mütevellî ve tescîl-i şer‘î olup lüzûmuna hükm-i hâkim lâhik olmadığı ecilden vakf lâzım olmamağın, mesfûre Kamer menzil-i mezkûrun vakfiyetinden rücû‘ edip mülkiyyet üzre bey‘ etmişdir deyüp ve menzil-i mezbûrun vakfiyetinin lüzûmuna delâlet eder temessük olmayıp, menzil-i mezbûr teslîm-i mütevellî ve tescîl-i şer‘î [75a] olmadığı mukarrer olmağla, kavl-i müftâun bih üzre vakfiyeti lâzım olmamağın, mezbûr Mehmed Çelebi’ye cânib-i şer‘-i şerîfden menzil-i mezbûrun semeni olan meblağ-ı merkūm altmış bin akçeyi vekîl-i mesfûra teslîmine tenbîh olunup, mâ hüve’l-vâki‘ bi’t-taleb ketb olundu. Tahrîren fî 12 min Rebî‘ilevvel sene selâse ve elf. Şuhûdü’l-hâl: Fahru’l-kuzât Mevlânâ Hasan Efendi el-kadı, Abdülkerim Çavuş, Hüseyin Çavuş, İsa Efendi el-kadı, Hasan Çavuş, Yusuf Efendi el-kadı, Mehmed el-kâtib, Hürrem Ağa ez-zevvâk ve gayruhüm.