Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 290 Hüküm no: 312 Orijinal metin no: [75b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin b. Abdullah’ın Sitti Hatun Vakfı’na olan borcunun terekesinden kızı Rahime tarafından ödendiği Oldur ki, mahmiye-i Kostantıniyye’de vâki‘ merhûme Sitti Hâtun Vakfı’na hâlâ mütevellî olan Mahmud Çelebi b. Mehmed el-cündî meclis-i şer‘-i şerîfe hâzır olup, kazâ-i Galata’ya tâbi‘ Hasköy mahallâtından Perviz Efendi mahallesinde sâkin iken vefât eden merhûm Hüseyin b. Abdullah’ın sulbiye kızı ve bi tarîki’l-inhisâr vârisesi olan işbu râfi‘atü’l-kitâb Rahime Hâtun bt. ( ) mahzarında bi’t-tav‘ ve’r-rızâ ikrâr ve i‘tirâf edip mütevellîsi olduğum vakf-ı mezbûr mâlından müteveffâ-yı merkūm Hüseyin zimmetinde üç bin beş yüz akçe bâkī kalmış idi. Hâlâ müteveffâ-yı mezkûrun muhallefâtından meblağ-ı merkūm üç bin beş yüz akçeyi mezbûre Rahime yedinden bi’t-tamâm vakf için tevliyetim hasebiyle alıp kabz eyledim. Min ba‘d husûs-ı mezbûra müte‘allik mezbûre Rahime ile kat‘â alâkam kalmamışdır dedikde, mütevellî-i merkūmun ikrâr-ı meşrûhun mezkûre Rahime vicâhen tasdîk ve şifâhen tahkīk edip, mâ hüve’l-vâki‘ bi’t-taleb ketb olundu. Fî 15 Rebî‘ulevvel sene selâse ve elf. Şuhûdü’l-hâl: Ali b. Bahşi, Mustafa b. Mehmed, Yusuf b. Abdullah, Mevlânâ Kaya Çelebi el-kadı, Ahmed b. Hüseyin, Ali b. Hızır ve gayruhüm.