Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 289 Hüküm no: 311 Orijinal metin no: [75a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstefyar isimli Ermeni’nin vârisleri tarafından Kürkçüler kethüdâsı Mustafa Bey’e satılan menzilin parasının ödendiğinin tesbiti Oldur ki, mahmiye-i Kostantıniyye mahallâtından Şeyh Ferhad mahallesinde bundan akdem helâk olan İstefyar nâm Ermeni’nin sulbî kebîr oğulları Bâli ve Kili ve Merit nâm zimmîler asâleten ve zevci La‘lî bt. Hüdâverdi kendi tarafından asâleten ve kebîre kızları Bedr ve Seltan taraflarından vekâleten meclis-i şer‘-i şerîfe mahmiye-i mezbûrede hâlâ Kürkçüler kethüdâsı olan fahrü’l-akrân Mustafa Bey b. Abdullah nâm kimesneyi ihzâr ve mahzarında takrîr-i da‘vâ edip hâlik-i mezbûrdan bize irs-i şer‘le intikāl eden muhallefâttan mahalle-i mezkûrede vâki‘ lede’l-ahâlî ma‘lûmetü’l-hudûd olan menzili bundan akdem merkūm Mustafa Bey’e cümlemiz yetmiş altı bin akçeye bey‘-i bâtt ile bey‘ edip altmış beş bin akçesin kabz edip on bir bin akçesi uhdesinde bâkīdir, hâlâ taleb ederiz dediklerinde, gıbbe’s-suâl mezkûr Mustafa Bey cevâb verip fi’l-hakīka menzil-i mezkûru sâbıkan yetmiş altı bin akçeye mezbûrların cümlesinden iştirâ etmiş idim. Lâkin ba‘dehû bey‘-i mezbûr cümlesinin rızâlarıyla fesh olunup on gün mürûr ettikden sonra tekrâr mezbûrlar gelip menzil-i merkūmu bana asâleten ve vekâleten altmış beş bin akçeye rızâlarıyla akd-i cedîd ile bey‘ edip meblağ-ı mezbûru bi’t-tamâm kabz edip benim zimmetimde meblağ-ı mezbûrdan bir akçe ve bir habbe bâkī kalmamışdır dedikde, mezbûrlar inkâr edip istişhâd olundukda, udûl-i Müslimînden Cafer Bey b. Mustafa ve (…) ve Turgud b. Hamza nâm kimesneler li ecli’ş-şehâde hâzırân olup fi’l-vâki‘ [75b] mukaddemâ merkūm Mustafa Bey menzil-i mezbûru mesfûrların cümlesinden yetmiş altı bin akçeye iştirâ edip lâkin ba‘dehû bey‘-i mezbûr kendi rızâlarıyla fesh olunup on gün mürûr ettikden sonra tekrâr mezbûrlar gelip menzil-i merkūmu mezkûr Mustafa Bey’e asâleten ve vekâleten altmış beş bin akçeye rızâlarıyla akd-i cedîd ile bey‘ edip meblağ-ı merkūmu bi’t-tamâm kabz etmişlerdir. Biz bu husûsa şâhidleriz, şehâdet dahi ederiz deyû bi’l-muvâcehe edâ-yı şehâdet-i şer‘iyye ettiklerinde, mezbûrânın şehâdetleri ba‘de’l-kabûl hayyiz-i kabûlde vâkı‘a olup, mâ hüve’l-vâki‘ bi’t-taleb ketb olundu. Tahrîren fî evâsıtı Rebî‘ilevvel sene selâse ve elf. Şuhûdü’l-hâl: El-Hâc Mahmud b. Mehmed el-imâm, Mevlâna Mehmed Efendi b. eş-Şeyh Nazar el-hatîb, Seyyid Mustafa [b.] Seyyid Mehmed, Hasan b. Hamza, Hüseyin Çelebi [b.] Mahmud, Halil b. Musa, İsa b. Resûl ve Halil b. Ali, Mehmed Çelebi b. Ali, Üstâd Timur Ali, İsa b. Resûl el-mü’ezzin gayruhüm.