Rumeli Sadareti Mahkemesi 21 Numaralı Sicil (H. 1002-1003/M. 1594-1595) cilt: 12, sayfa: 292 Hüküm no: 316 Orijinal metin no: [76a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe Hatun’un vefatıyla babası Mustafa b. Ferhad ve kocası İlyas b. Abdullah’ın arasındaki davada sulhun bozulup, davanın yeniden görülmesi Mahmiye-i Kostantıniyye mahallâtından Mimar Sinan mahallesinde bundan esbak vefât eden merhûme Ayşe Hâtun’un babası ve vârisi olan işbu râfi‘ü’l-kitâb Mustafa b. Ferhad meclis-i şer‘-i şerîfe hâzır olup müteveffât-ı mezbûrenin zevci ve vârisi olan İlyas b. Abdullah nâm kimesne mahzarında takrîr-i kelâm edip bundan akdem mezbûr İlyas ile müteveffât-ı merkūmenin muhallefâtına müte‘allik nice husûmet ve nizâ‘ımız olup bilâhare muslihûn tavassutuyla ben mezbûr İlyas’a on iki bin akçe teslîm etmek üzre sulh olup, meblağ-ı mezbûrun beş bin akçesin mezbûra teslîm edip yedi bin akçesin dahi teslîm etmek üzre iken yine tarafeynden sulhu fesh edip husûs-ı mezbûr tekrâr aslından görülmek lâzım olmuşdur, eyle olsa mezkûr İlyas’a teslîm eylediğim beş bin akçeyi taleb ederin dedikde, gıbbe’s-suâl sâlifü’z-zikr İlyas cevâb verip, fi’l-vâki‘ kaziyye minvâl-i meşrûh üzredir, lâkin benim mezbûr Mustafa yedinden kabz eylediğim akçe dört bin beş yüz akçedir ziyâde değildir deyû bu mikdârın i‘tirâf edip beş yüzün inkâr eyledikde, mezbûr İlyas’dan sâdır olan kelâm mezbûr Mustafa talebiyle ketb olundu. Tahrîren fî 20 min Rebî‘ilevvel sene selâse ve elf. Şuhûdü’l-hâl: Mustafa b. Hamza, Mehmed Efendi el-kadı, Mahmud Çavuş b. Abdullah, Hasan b. Abdullah.