Bab Mahkemesi 54 Numaralı Sicil (H. 1102 / M. 1691) cilt: 20, sayfa: 183 Hüküm no: 196 Orijinal metin no: [31b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çelebi b. Abdullah’ın Haffâflar Arastası Vakfı’na olan borcunu ödemesi Mahmiye-i İstanbul’da Karaman kurbunda vâki‘ haffâflar arastasının bâzvend ve kanadlarına mevkūfe nukūda hâlâ mütevellî olan işbu râfi‘ü’l-kitâb Ali b. Hasan nâm kimesne meclis-i şer‘-i şerîfde, zikr olunan arastada haffâf olan Mustafa Çelebi b. Abdullah mahzarında bi’t-tevliye üzerine da‘vâ ve takrîr-i kelâm edip, nukūd-ı merkūme-i mezbûreye benden mukaddem mütevellî olan işbu hâzır bi’l-meclis İbrahim Çelebi b. ( ) emvâl-i vakf-ı mezbûrdan merkūm Mustafa Çelebi’ye otuz guruş idâne ve teslîm, ol dahi istidâne ve kabz ve tesellüm eyledikden sonra meblağ-ı mezbûru kable’l-ahz merkūm İbrahim Çelebi tevliyet-i mezbûreden azl ve yerine ben mütevellî olmağla üçümüz bir mahalde iken meblağ-ı mezbûr ile beni merkūm Mustafa Çelebi üzerine ihâle ve tevkîl edip, her birimiz kabûl etmeğin mezbûr Mustafa Çelebi kaziyye vech-i muharrer üzre olup zimmetinde ol mikdâr deyn olduğunu alâ ru’ûsi’l-işhâd ikrâr ve i‘tirâf etmeğin, hâlâ taleb eylediğimde edâdan imtinâ‘ eder suâl olunup alıverilmesi matlûbumdur [32a] dedikde, gıbbe’s-suâl mezbûr Mustafa Çelebi cevâbında mütevellî-i sâbık merkūm İbrahim Çelebi’den ancak on guruş istidâne ve kabz edip zimmetinde deyni idiğini ikrâr ve ziyâde yirmi guruşu inkâr eyledikleri mütevellî-i mezbûrdan ziyâde müdde‘âsına beyyine taleb olundukda, udûl-i müslimînden el-Hâc Mehmed ve Mehmed b. Abdullah ve Mehmed Ağa b. Ömer nâm kimesneler li ecli’ş-şehâde meclis-i şer‘de hâzırûn olup isre’l-istişhâd, fi’l-hakīka işbu mezbûr Mustafa Çelebi mütevellî-i sâbık işbu merkūm İbrahim Çelebi yedinden asl-ı mâl vakf-ı mezbûrdan otuz altı guruş istidâne ve fasl edip meblağ-ı mezbûru benden kable’l-ahz mezbûr İbrahim Çelebi’yi tevliyet-i mezbûrdan azl ve sâbık müdde‘î-i mezbûr mütevellî olmağla mezbûr İbrahim Çelebi meblağ-ı mezbûr ile müdde‘â-yı mezbûr benim üzerime ihâle ve tevkîl ve her birimiz kabûl etmişdik. Hâlâ meblağ-ı mezbûr otuz sekiz guruş taraf-ı vakf-ı mezbûra zimmetimde lâzımü’l-edâ deynimdir deyu bizim huzûrumuzda ikrâr ve i‘tirâf edip bizi işhâd etmişdi. Biz bu husûsa bu vech üzre şâhidleriz, şehâdet dahi ederiz deyu her biri edâ-i şehâdet-i şer‘iyye eylediklerinde, gıbbe’t-ta‘dîl ve’t-tezkiye şehâdetleri makbûle olmağın, mûcebiyle ba‘de’l-hükm ve’t-tenbîh mâ hüve’l-vâki‘ bi’t-taleb ketb olundu. Fi’l-yevmi’s-sâlis min Cumâdelâhire sene 1102. Şuhûdü’l-hâl: El-Hâc İbrahim b. Ahmed, İbrahim Çelebi b. Ahmed, Ali Çelebi b. Hüseyin, Ali Çelebi b. Bâli, Ahmed b. Şaban ve gayruhüm.