Bab Mahkemesi 54 Numaralı Sicil (H. 1102 / M. 1691) cilt: 20, sayfa: 184 Hüküm no: 197 Orijinal metin no: [32a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Receb’in menzilini Ahmed Çelebi b. Mahmud’a satması Mahmiye-i İstanbul’da Harâccı Muhyiddin mahallesinde sâkin Mehmed Çelebi b. Receb meclis-i şer‘-i şerîf-i enverde, bâ‘isü’l-kitâb Ahmed Çelebi b. Mahmud mahzarında ikrâr-ı tâm ve takrîr-i kelâm edip, akd-i âti’z-zikr sudûruna değin silk-i mülkümde münselik olup mahalle-i mezbûrede vâki‘ bir tarafdan tarîk-i âm ve bir tarafdan tarîk-i hâs ve bir tarafdan benim âhar mülküm ve bir tarafdan İsmail Çelebi menzili ile mahdûd, iki bâb fevkānî oda ve bir su kuyusu ve tarîk-i âm tarafında vâki‘ kezâlik iki bâb tahtânî oda ve kenîf ve havluyu müştemil menzilimi, bi cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâviye bey‘-i bâtt-ı sahîh-i şer‘î ile mezbûr Ahmed Çelebi’ye elli iki bin akçeye bey‘ ve temlîk ve teslîm, ol dahi ber vech-i muharrer iştirâ ve temellük ve tesellüm ve kabûl ettiğinden sonra semeni olan meblağ-ı mezbûr elli iki bin akçeyi mezbûr Ahmed Çelebi yedinden bi’t-tamâm ve’l-kemâl ahz u kabz eyledim. Ba‘de’l-yevm menzil-i mahdûd-ı mezbûrda kat‘â alâka ve medhalim kalmayıp mezbûrun mülk-i müşterâsı ve hakk-ı sırfı olmuşdur, keyfe mâ yeşâ ve yahtâr mutasarrıf olsun dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ min Cumâdelâhire sene 1102. Şuhûdü’l-hâl: Mustafa Bey b. Ali, İsmail Çelebi b. Receb, Ahmed Çelebi b. Mustafa, Hasan Efendi b. Mustafa el-imâm, Bektaş Bey b. Mahmud, Veli Çelebi b. Mahmud, Mehmed Çelebi b. Ahmed.