Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 153 Hüküm no: 132 Orijinal metin no: [25a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâbık İstanbul kadısı Mehmed Efendi’ye âid olan ve husûmete sebep olan menzilin Ahmed Bey tarafından satın alındığı Dergâh-ı âlî -dâme mahfûfen bi’l-me‘âlî- müteferrikalarından bâ‘isü’l-kitâb Cafer Ağa b. İbrahim mahfil-i kazâda mahmiye-i Belgrad sükkânından Ahmed Bey b. Mehmed el-cündî mahzarında takrîr-i kelâm edip mahmiye-i mezbûrede Pazarbaşı mahallesinde vâkı‘ lede’l-ahâlî ve’l-cîrân ma‘lûmü’l-hudûd olup sâbıkā İstanbul kādısı olan fahrü’l-ulemâʼil-kirâm Mehmed Efendi hazretlerinden iştirâ olunan menzil husûsunda mezbûr ile da‘vâ ve husûmetim vardır menzil-i mersûmda alâkası var mıdır suâl olunup takrîr[i] tahrîr olunmak matlûbumdur dedikde merkūm Ahmed Bey dahi istintâk olundukda menzil-i mezbûr mukaddemâ sulbî oğlum Mehmed nâm kimesne içün merkūmun malıyla müşârun-ileyh Mehmed Efendi’den bi’l-vekâle iki bin guruşa iştirâ ediverdim hâlâ menzil-i mezbûr oğlum mezkûr Mehmed’in mülküdür benim alâkam yokdur dedikde sûret-i hâl hıfz-ı makāl içün gıbbe’t-taleb ve’s-suâl ketb olundu. Hurrire fî-evâʼili şehri Şa‘bâni’l-mu‘azzam li-sene selâse ve selâsîn ve elf. Şuhûdü’l-hâl: Ahmed Bey b. Abdullah el-cündî, Ahmed Halîfe tabbâh-ı hâssa, Hüseyin Çavuş b. Mehmed, Receb b. Bayram, el-Hâc Mahmud.