Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 153 Hüküm no: 133 Orijinal metin no: [25a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Bey b. Gülâbî’nin kendisine âid olduğunu iddia ettiği câriyenin Sayime bt. Hüseyin’e âid olduğunun anlaşıldığı Dergâh-ı âlî -dâme mahfûfen bi’l-me‘âlî- sipâhîlerinden Ömer Bey b. Gülâbî mahfil-i şer‘-i hatîrde bâ‘isetü’l-kitâb Sayime bt. Hüseyin nâm hatun mahzarında üzerine takrîr ve da‘vâ edip mezbûrenin yedinde olan işbu orta boylu açık kaşlı gök elâ gözlü asfaru’l-levn Moskoviyyetü’l-asl Mülâyim bt. Abdullah nâm câriyeyi târîh-i kitâbdan iki yıl dört ay mukaddem ben ( ) nâm hatundan şirâʼ-i şer‘î ile semen-i ma‘lûm ile iştirâ ve temellük etmekle mülküm olup ba‘dehû mâlımdan ibâk etmeden mezbûrenin yedinde buldum taleb ederim dedikde gıbbe’s-suâl mezbûre Sayime cevâbında ben mevsûfe-i mezkûre Mülâyimi târîh-i kitâbdan iki yıl altı ay mukaddem esirci tâifesinden Hacı Mehmed nâm kimesneden yedi bin fıddî akçeye iştirâ eyledim târîh-i mezbûrdan ile’l-ân yedimdedir deyü ikisi dahi târîh-i mülk beyân edip zü’l-yedin tarihi esbak olup da‘vâyı def‘ eyledikde bu sûrette zü’l-yed olan mezbûre Sayime’nin beyyinesi evlâ olmağın mezbûre Sayime’den takrîrine mutâbık beyyine taleb olundukda udûl-i Müslimînden Sultan Selim Hân mahallesi sâkinlerinden Süleyman b. Yunus ve Macuncu ahâlîsinden Ömer b. Mustafa nâm kimesneler li-ecli’ş-şehâde meclis-i şer‘-i hatîrde hâzırân olup fi’l-hakīka mevsûfe-i mezbûre Mülâyimi merkūme Sayime Hatun târîh-i kitâbdan iki yıl altı ay mukaddem bizim huzûrumuzda mezkûr Hacı Mehmed’den yedi bin fıddî akçeye iştirâ ve temellük edip tarîh-i mesfûrdan ile’l-ân mülkündedir bu husûsa şâhidleriz şehâdet dahi ederiz deyü edâ-i şehâdet-i şer‘iyye eylediklerinde gıbbe ri‘âyeti şerâʼiti’l-kabûl şehâdetleri makbûle olup câriye-i mezbûre merkūm Sayime Hatun’un yedinde ibkā olunup merkūm Ömer Bey ta‘arruzdan men‘ olunup mâ-hüve’l-vâkı‘ bi’t-taleb ketb olundu. Tahrîren fi’l-yevmi’s-sâlis ışrîn min-Şa‘bâni’l-mu‘azzam li-sene selâse ve selâsîn ve elf. Şuhûdü’l-hâl: Receb Çavuş b. İsmail, Süleyman b. Ali, Piyâle Bey el-cündî, Seyfi b. Muharrem el-imâm, Hüseyin Bey b. Mehmed ve gayruhüm.