Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 159 Hüküm no: 139 Orijinal metin no: [26b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Resul Beşe b. Mehmed’in vârisi olmadığından terekesinin beytülmale geçtiği ve alacağının tahsili Mahmiye-i İstanbul’da bi’l-fi‘il Dergâh-ı âlî yeniçerileri beytü’l-mâl emîni olan fahrü’l-emâsil Musa Ağa b. Mustafa tarafından husûs-ı âti’z-zikri ikrâra vekîl olup vekâleti alâ-vechi’l-hasm nehc-i şer‘î üzere sâbite olan fahrü erbâbi’l-kalem İbrahim Ağa b. Hasan el-kâtib mahfil-i şer‘-i hatîrde işbu bâ‘isü’l-kitâb Ebûbekir Çelebi b. İbrahim mahzarında bi’l-vekâle ikrâr ve takrîr-i kelâm edip zümre-i râcilînden olup dokuzuncu sekbânlar cemâ‘atinden olan Resul Beşe b. Mehmed nâm râcil bundan akdem mahmiye-i mezbûrede müteveffâ olup zâhirde vâris-i ma‘rûfu olmamağla terekesi beytü’l-mâle kabz u zabt olundukda mesfûr Resul Beşe’nin merkūm Ebûbekir Çelebi zimmetinde vasfı ve zirâ‘ı ilm-i şer‘î ile beynlerinde ma‘lûm bez bahâsından yirmi iki bin dört yüz akçe hakkı olmağın ba‘de vefâtihî emr-i hâkimü’ş-şer‘le meblâğ-ı mezbûru müvekkilim müşârun-ileyh Musa Ağa mezkûr Bekir Çelebi yedinden alıp kabz edip yedine hat ve hâtemini müştemil temessük verdi dedikde gıbbe’t-tasdîk vicâhen mâ-hüve’l-vâkı‘ bi’t-taleb ketb olundu. Tahrîren fî-evâsıtı şehri Şa‘bâni’l-mübârek li-sene selâse ve selâsîn ve elf. Şuhûdü’l-hâl: Mehmed Efendi b. el-müderris, Abdülbasir b. Abdullah, Mustafa b. Abdullah, Hacı Şaban b. el-Hâc İslâm, Abdülkerim b. Mehmed, Hacı İbrahim b. Abdullah, Ali b. Musa, Ahmed b. Hacı Emrullah, Ahmed b. Mahmud, Hacı Hasan b. Hüseyin, İbrahim b. Hanefi ve gayruhüm.