Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 157 Hüküm no: 138 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa b. Emrullah’ın Hatice Sultan mahallesindeki evini vakfettiği El-Hamdü lillâhi ve’s-salâtü alâ-nebiyyihi ve alâ-âlihi ve sahbihi ecma‘în. Ammâ ba‘d bâ‘is-i tahrîr-i kitâb-ı sahîh-i şer‘î ve bâdî-i terkīm-i hitâb-ı mer‘î budur ki; mahmiye-i Kostantiniyye humiyet ani’l-âfet ve’l-beliyye mahallâtından Hatice Sultan mahallesinde sâkin sâhibü’l-hayrât ve’l-hasenât râgıbü’l-meberrât ve’s-sadakāt hâlâ sipâhîler oğlanı kethüdâsı olan iftihârü’l-emâcid ve’l-ekârim câmi‘u’l-mehâmid ve’l-mekârim Ahmed Ağa b. Emrullah meclis-i şer‘-i şerîf-i lâzımü’t-teşrîfde vakf-ı âti’z-zikre li-ecli’t-tescil mütevellî nasb ettiği fahrü erbâbi’t-tahrîr ve’l-kalem ve erbâbi’t-tahrîr ve’r-rakam Mustafa Efendi b. Abdullah mahzarında ikrâr-ı sahîh-i şer‘î ve i‘tirâf-ı sarîh-i mer‘î kılıp mahalle-i mezbûrede vâkı‘ bir tarafı Medîne-i Münevvere sallallâhu te‘âlâ alâ-münevvirihâ vakfına ve a‘lemü’l-ulemâ’i’l-izâm sâbıkā Bağdad kādısı olan Ebûbekir Efendi mülküne ve bir tarafdan merhûm Mehmed Paşa Vakfı’na ve Âişe Hatun mülküne ve Âişe bt. Yunus mülküne ve iki tarafdan tarîk-i âmma müntehî olup muhavvateyni müştemil muhavvata-i dâhiliyyesi dört beyt-i süflâyı ve biʼr-i mâyı ve iki fırını ve dehlizi ve iki matbahı ve üç sofa ve bir beyt-i ulvîyi ve kilârı ve hadîka-i zât-ı eşcâr-ı müsmire ve gayr-i müsmireyi ve iki kenîfi ve muhavvata-i hâriciyyesi üç beyt-i ulvîyi ve bir sofayı ve dehlizi ve iki ahırı ve bir beyt-i süflâyı ve biʼr-i mâyı ve iki kenîfi ve muhavvatayı hâvî arsası merhûm-ı mûmâ-ileyh Mehmed Paşa Vakfı’ndan olan mülk menzilimi bi cümleti’t-tevâbi‘ ve’l-levâhık ve kâffetü’l-menâfi‘ ve’l-merâfık vakf ve habs edip şöyle şart eyledi ki; süknâsı evvelâ nefsine ba‘dehû evlâdına ve evlâd-ı evlâdına ve evlâd-ı evlâd-ı evlâdına ve ba‘de’l-inkırâz halîlesi Hatice Hatun bt. Hızır ve ba‘dehâ ücretini utekāsına mukābele-i ücretten utekā-i mezbûr beher yevm birer sûre-i ihlâs tilâvet eyleyeler ve ba‘dehüm merhûm-ı mezbûr Mehmed Paşa Vakfı’na her kim mütevellî olup menzil-i merkūma vaz‘-ı yed edip ecr-i misli ile icâr olunup hâsıl olan ücretinden üç nefer kimesneye ikişer akçe verilip Kur’ân-ı azîmü’ş-şândan birer cüz’-i şerîf tilâvet olunup sevâbını rûhuna ihdâ eyleyeler ücret-i mezbûreden fazla kalanı mütevellî-i vakf-ı mezbûr kabz edip menzil-i mezbûrun meremmâtına harc eyleye ve tebdîl ve tağyîr yedimde ola dedikde gıbbe’t-tasdîki’ş-şer‘î vâkıf-ı mezbûrdan vakf-ı mezkûreden rücû‘ edip vakf-ı akār inde’l-cumhûr sahîhdir lâkin inde’l-imâmi’l-‘zam ve’l-hümâmi’l-efham Ebû Hanîfe el-Kûfî âmelehullâhu te‘âlâ bi-lûtfihi’l-celî ve’l-hafî- katında gayr-i lâzımdır deyü menzil-i mezbûru mülküne istirdâd ettikde mütevellî-i mûmâ-ileyh dahi bi-tarîki’l-mu‘âraza cevâb-ı bâ-savâb verip gerçi sıhhate vakf-ı akār imâm-ı mezkûr katında lüzûmdan âriyedir lâkin imâmeyn-i hümâmeyn Ebû Yusuf el-İmâmü’s-sânî ve İmâm Muhammed b. Hasan eş-Şeybânî katlarında lâzımdır deyü vâkıf-ı mezbûr ile muhâsama edip hâkim-i mûmâ-ileyh esbeğallâhü ni‘amehu aleyh hazretlerine murâfa‘a olduklarında mütevellî-i mezbûr hâkim-i müşârun-ileyhden hüküm taleb etmeğin hâkim-i mûmâ-ileyh dahi lüzûm-ı vakfı evlâ ve ahrâ görüp vakf-ı mezbûrun sıhhat ve lüzûmuna beyne’l-eimmeti’l-eslâf cârî olan hilâfı âlim oldukları hâlde hükm-i sahîh-i şer‘î ile hükmedip vakf-ı sahîh-i müseccel ile vakf oldukdan sonra naks ve nakzına muhâl oldu “fe-men beddelehu ba‘demâ semi‘ahu fe-innemâ ismühû ale’llezîne yübeddilûne innellâhe semî‘un alîm ve ecrü’l-vâkıfı ale’l-hayyi’l-cevâdi’l-kerîm”. Cerâ zâlike ve hurrire fi’l-yevmi’s-sânî min-Şa‘bâni’l-mu‘azzam li-sene selâse ve selâsîn ve elf. Şuhûdü’l-hâl: Fahrü’l-eimme Hüseyin Efendi b. Ali, el-imâm, fahrü’l-eimme Mehmed Efendi b. Ali el-hatîb, fahrü’l-a‘yân İbrahim Efendi el-mübâşir, fahrü’l-akrân Hasan Ağa b. ( ), fahrü’l-akrân Mehmed Çelebi el-cündî, fahrü’l-akrân Ömer Çelebi el-cündî, fahrü’l-cüyûş Mahmud Çavuş, umdetü’l-eimme-i Hasan Efendi b. Hüseyin el-imâm, fahrü’l-akrân Mehmed Çelebi el-cündî, fahrü’l-imâm Ahmed Çelebi, el-Hâc Hüseyin b. Ali, Hasan Çelebi el-haffâf, Yusuf b. Abdullah, Kadri b. er-râcil, ve muharriru’l-hurûf Abdulbâki, Hüseyin b. Mehmed, Ali b. Abdullah, Ali b. Mahmud, ve gayruhüm mine’l-huzzâr ve’l-müslimîn.