Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 161 Hüküm no: 145 Orijinal metin no: [26b-7, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terekesi Beytülmâl tarafından zabt edilen Toma v. Nikola’nın vârislerinin iki kardeşi olduğu Vilâyet-i Anadolu-i ma‘mûre’de Trabzon livâsı Rize kasabası mahallâtından Kalohtin mahallesinden olup hâlen mahmiye-i Galata tevâbi‘inden Tarabya karyesinde sakinân olan udûlden Osman b. Abdullah ve Ömer b. Hüseyin nâm kimseler Dîvân-ı âlî’de -dâme mahfûfen bi’l-me‘âlî- akdedilen meclis-i şer‘-i şerîfe hâzırân olup, mahmiye-i mezbûrede vâki‘ Beytül emîn-i sâbıkı olan ve karye-i mezbûrede bundan akdem hâlik olan Toma v. Nikola v. Mihal nâm zimmînin terekesine vâzı‘-ı yed bulunan âti’z-zikr verâseti münkir hasm-ı şer‘î-i câhid fahrü’l-akrân Mehmed Bey b. Hüseyin el-cündi mahzarında, bâ‘is-i hâze’l-kitâb Andon v. Nikola nâm zimmîden sâdır da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki, müdde‘î-yi mezbûr, hâlik-i mezkûrun ana-baba bir er karındaşı ve usûbet-i nesebiyye cihetiyle vârisidir. Babaları Nikola v. Mihal, anaları Anzile bt. Mihal en-Nasrâniyyedir. Maskat-ı re’sleri de kasaba-i mezbûredir. Verâseti ona ve li-ebeveyn kız karındaşı Kalornad bt. Nikola en-Nasrâniyyeye münhasırdır. Onlardan gayrı vâris ve terekesine müstehak kimse ma‘lûmumuz değildir. Ba‘de ri‘âyet-i şerâiti’l-kabûl şehâdetleri hayyiz-i kabûlde vâki‘ olmağın mûcibiyle alâ-vechi’l-mastûr müdde‘î-yi mezbûrun verâsetine hükmedildi. Cerâ zâlike ve hurrire fî-evâhiri şehri Şa‘bâni’l-mu‘azzam li-sene selâse ve selâsîn ve elf. Şühûdü’l-hâl: Umdetü’l-emâsil Mahmud Ağa b. Abdülmennan, Ahmed Ağa b. Derviş el-muhzır, Mehmed Efendi b. el-müderris, Ömer Beşe b. Abdullah er-râcil, Abdi Beşe b. Abdullah er-râcil, Ömer Bey b. Hüseyin, Mehmed b. Abdi, Hacı Abbas b. İbrahim, Hacı Mahmud b. Ali, Mehmed b. Mustafa