Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 169 Hüküm no: 154 Orijinal metin no: [29a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım bt. Mehmed Bey’in kocası Ahmed Ağa’ya olan borcunu ödeyip kendisinden muhâla‘a yoluyla boşandığı Bu hüccet sehvle yanlış kaydolunmuşdur. Sahîhi beşinci kağıdın zahrında iki[nci] hüccettir. Gaflet olunmaya Mahmiye-i Kostantiniyye’de Horhor çeşmesi kurbünde Sofular mahallesinde sâkine olup muhaddere olmağla mahfil-i kazâya huzûru müte‘azzir olan umdetü’l-muhassenât Âişe Hanım bt. Mehmed Bey nâm hatunun vech-i âtî üzere mürûr eden ikrârını ketb ve tahrîr içün nâib taleb olundukda savb-ı şer‘den mevlânâ Ahmed irsâl olunup mezbûrenin mahalle-i mezkûrede sâkine olduğu menziline varıp akd-i meclis olundukda mezbûre Âişe Hanım mahalle-i merkūme İmâmı Mevlânâ Muharrem Efendi b. Sadık ve Ali Çavuş b. Şaban ta‘rîfleriyle mu‘arrefe oldukdan sonra zevci bâ‘isü’l-kitâb umdetü’l-emâsil ve’l-akrân Ahmed Ağa b. Süleyman nâm müteferrika muvâcehesinde ikrâr-ı tâm ve takrîr-i kelâm edip zevcim müşârun-ileyh Ahmed Ağa mukaddemâ bana hıfz içün on beş bin üç yüz akçe kıymetli bir kırmızı ve ala cibinlik ile yüz dört filori kıymetli bir murassa‘ bilezik verip ben dahi kabz ve zabt edip lâkin hıfzında taksîr edip ta‘addî ile zâyi‘ etmeğin hâlâ orta boylu açık kaşlı gök gözlü ebyazü’l-levn Rusiyyetü’l-asl Sahve bt. Abdullah ve uzun boylu açık kaşlı kara gözlü kara yağız Rusiyyetü’l-asl Sitemkar bt. Abdullah nâm câriye-i memlûkelerimi safka-i vâhîde ile zevcim müşârun-ileyh Ahmed Ağa’ya on beş bin üç yüz fıddî akçe ve yüz dört filoriye bey‘ edip semenini zikr olunan cibinlik ve bilezik kıymetlerinden şer‘an zimmetime damânı lâzım olan meblâğ-ı mezbûr on beş bin üç yüz akçe ve yüz dört filoriye mukāssa eylediğimden sonra mezbûr Ahmed Ağa ile kırk bin akçe mehr-i müeccelimi ve nafaka-i iddetim ve meʼûnet-i süknâ üzerime ve mukaddemâ müşârun-ileyh Ahmed Ağa mahalle-i mezbûrda vâkı‘ ma‘lûmü’l-hudûd menzili iştirâ eyledikde merkūma mâlımdan ifrâz ve def‘ eylediğim altmış altı bin fıddî akçe deyni üzerine muhâla‘a edip zevciyyete ve meblâğ-ı merkūma ve sâir husûsa müte‘allık cemî‘-i da‘vâ ve mutâlebât ve eymân-ı muhâsamâttan zimmetini ibrâ-i âmm-ı kātı‘ü’n-nizâ‘la ibrâ eyledim dedikde mukırra-i mezbûreyi kelimât-ı meşrûhasında müşârun-ileyh Ahmed Ağa dahi bi’l-müvâcehe tasdîk ve bi’l-müşâfehe tahkīk eyledikden sonra sûret-i hâli mevlânâ-yı mezbûr mahallinde ketb ve tahrîr edip ba‘dehû gelip meclis-i şer‘-i münîrde ihbâr ve takrîr etmeğin mâ-vaka‘a gıbbe’t-taleb ketb olundu. Hurrire fi’l-yevmi’s-sâdis min-şehri Ramazâni’l-mübârek li-sene selâse ve selâsîn ve elf. Şuhûdü’l-hâl: Ahmed Efendi b. Ali el-imâm, Halil Efendi b. Mikâil el-imâm, Osman Subaşı b. Ahmed, Hüseyin b. Mustafa, Musa Çelebi b. Eyüb el-müezzin bi Kırkçeşme, Mehmed b. Sadi, Mehmed b. Mustafa, Ali b. Abdullah.