Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 170 Hüküm no: 155 Orijinal metin no: [29a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çavuş b. Mehmed’e rüşvet yoluyla Bekir Bey b. Mehmed’den aldığı parayı iâde etmesi husûsunda tembihte bulunulduğu Sâbıkā Ergani Sancağıbeyi olan bâ‘isü’l-kitâb umdetü’l-ümerâʼi’l-kirâm Bekir Bey b. Mehmed mahfil-i şer‘-i hatîrde belde-i Rakka ahâlîsinden olup el-ân mahmiye-i İstanbul’da sâkin olan fahrü’l-cüyûş Mustafa Çavuş b. Mehmed mahzarında üzerine da‘vâ edip bundan akdem bin otuz iki senesi şehri Ramazâni’l-mübârekinin evâsıtında bana zikr olunan sancağı alıvermek içün bi-tarîki’r-rüşve mezbûr Mustafa Çavuş’a mâlımdan sahîhü’l-ayâr ve kâmilü’l-vezn altmış altun ve yüz otuz aded guruş ve her biri onar akçeye râyic dört bin beş yüz fıddî Osmânî def‘ u teslîm edip ol dahi alıp kabz etmiş idi meblâğ-ı mezbûrun şer‘an reddi vâcib olmağın taleb ederim dedikde gıbbe’s-suâl müşârun-ileyh Mustafa Çavuş cevâbında vech-i mezkûr üzere mûmâ-ileyh Bekir Bey’in yedinden tarîh-i mezbûrda bi-tarîki’r-rüşve sahîhü’l-ayâr ve kâmilü’l-vezn altmış Filori ve yüz otuz guruş ve her biri onar akçeye râyic dört bin beş yüz fıddî Osmânî aldığını i‘tirâf edicek i‘tirâfı mûcebince bi-gayr-i vech-i şer‘î aldığı meblâğ-ı mârrü’z-zikri reddetmeye tenbîh olunup mâ-vaka‘a bi’t-taleb ketb olundu. Hurrire fî-evâʼili şehri Ramazâni’l-mübârek li-sene selâse ve selâsîn ve elf. Şuhûdü’l-hâl: Cafer Çavuş el-mübâşir, Mahmud Çavuş kethüdâ, Ahmed Ağa reîsü’l-muhzır, Murad Ağa b. Abdullah el-cündî, Mehmed Bey b. Ali, ve gayruhüm.