Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 188 Hüküm no: 177 Orijinal metin no: [34a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Bey b. Ali’nin şikâyetçi olduğu Abdulbâki Çavuş ve annesinin iyi insanlar oldukları Husûs-ı âti’z-zikri mahallinde istima‘ı içün mahmiye-i Kostantiniyye’de Muhtesib İskender mahallesine varılıp akd-i meclis olundukda Mehmed Bey b. Ali nâm kimesne mahfil-i şer‘-i hatîrde kendü tarafından asıl ve vâlidesi Kamer bt. Nasuh nâm hatun tarafından husûs-ı âtîye vekîl olup vekâleti nehc-i şer‘î üzere sâbite olan Abdulbâki Çavuş b. Ahmed Efendi mahzarında takrîr-i kelâm edip târîh-i kitâbdan yedi gün mukaddem mezbûr Abdulbâki Çavuş’un mülk menzilinin muhavvata-i hâriciyyesinde olan odada ücret-i ma‘lûme ile sâkin iken mezbûrlar ve Mercan nâm abd-i hizmetkârları ve Çeşmi bt. Abdullah nâm hatun benim Medyen nâm siyâh abd-i memlûkümü idlâl edip mezbûr dahi on sekiz bin akçeyi ve bir mutalla dülbend ile ba‘zı emti‘a-i ma‘lûmemi ahz edip mezbûrların yanına varıp ihfâ eylediler sûret-i hâl suâl olunsun ve mezbûrların keyfiyyet-i hâlleri ahâlî-i mahalleden istihbâr olunmak taleb ederin dedikde gıbbe’s-suâl mezbûr Abdulbâki Çavuş husûs-ı mezbûrdan benim ve vâlidemin bi-vechin mine’l-vücûh haberimiz yokdur deyü bi’l-külliye inkâr edip müdde‘î-i mezbûrdan beyyine taleb olundukda ityân-ı beyyineye kādir olmayıp her birine yemin verilmesin taleb eyledikde mezbûr Abdulbâki Çavuş ve mezbûre Kamer Hatun merkūm Mehmed Bey’in abd-i memlûkü mezkûr Medyen’i idlâl etmeyip ve saklamayıp bir vechile haberleri olmadığına her biri yemîn billâhi te‘âlâ eyledikden sonra mahalle-i mezbûre ahâlîsinden Mehmed Çelebi b. Hasan ve el-Hâc Nasuh b. Ali ve el-Hâc Veli b. Mîr ve Musa Beşe b. Mehmed er-râcil ve Ali Beşe b. Yusuf er-râcil ve Derviş b. Musa nâm kimesneler hâzırûn olup gıbbe’l-istihbâr mezbûr Abdulbâki Çavuş ve vâlidesi iyi adamlardır bu âna gelince yaramazlıkların görmedik ve bu makūle kabahatle töhmetleri yokdur deyü haber verdiklerinden sûret-i hâl gıbbe’t-taleb ketb olundu. Hurrire fî-evâsıtı şehri Ramazâni’l-mübârek. Şuhûdü’l-hâl: Umdetü’l-kuzât Mevlânâ es-Seyyid Mustafa Efendi, fahrü’l-eimme Mevlânâ İbrahim Efendi b. Mustafa, Mevlânâ Mehmed Efendi b. Behram, Derviş Beşe b. Musa, fahrü’l-akrân Mehmed Ağa b. Abdülmennân Subaşı, Cafer Çavuş b. Ahmed Çavuş el-mübâşir ve gayruhüm.