Rumeli Sadâreti Mahkemesi 40 Numaralı Sicil (H. 1033-1034 / M. 1623-1624) cilt: 46, sayfa: 187 Hüküm no: 176 Orijinal metin no: [34a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud b. Şeyhi’nin Osman Beşe b. Abdullah’taki alacağını tahsîl ettiği İşbu bâ‘isü’l-kitâb Mahmud b. Şeyhi mahfil-i şer‘-i şerîf-i hatîrde Osman Beşe b. Abdullah nâm recül mahzarında üzerine takrîr-i da‘vâ edip târîh-i kitâbdan dokuz yıl mukaddem ben mezbûr Osman Beşe bi-emri’llâhi’l-meliki’l-kadr eydî-i keferede esîr olup diyâr-ı Frenkde Alıkorna nâm kal‘ada iken mezkûr Osman Beşe benden kırk aded kâmil şerîfî Filori istikrâz edip ben dahi ikrâz ve teslîm eyledim idi. Meblâğ-ı mezbûru taleb ederim dedikde gıbbe’s-suâl mezbûr Osman Beşe dahi cevâbında hâl zikr olunan minvâl üzere olduğunu i‘tirâf edip lâkin mukaddemâ Süleyman Ağa b. Abdullah nâm zevvâk-ı Sultânî eydî-i [kefereden] tahlîs içün kal‘a-i merkūmeye geldiğinde müdde‘î-i mezbûr Mehmed meblâğ-ı mezkûru ahz u kabza ve kendüye îsâle mezkûr Süleyman Ağa’yı mahzar-ı Müslimînde tevkîl etmeğin ben dahi bi-inâyetillâhi te‘âlâ halâs olup mahmiye-i İstanbul’a geldiğimde mezbûr Süleyman Ağa vekâleti hasebiyle zikr olunan kırk şerîfî Filoriyi benden taleb edip bi’t-tamâm ve’l-kemâl yedimden alıp kabz eyledi dedikde müdde‘î-i mezbûr dahi mesfûr Süleyman Ağa’yı kabza tevkîli ve teslîmini bi’l-külliye inkâr edip gıbbe’l-istişhâd udûl-i Müslimînden İbrahim b. Pervâne ve Memi b. Abdullah nâm kimesneler li-ecli’ş-şehâde hâzırân olup fi’l-vâkı‘ müdde‘î-i merkūm Mahmud kal‘a-i mezkûrede meblâğ-ı mârrü’z-zikri ahz u kabz ve kendüye îsâle mezkûr Süleyman Ağa’yı bizim huzûrumuzda vekîl nasb edip ol dahi vekâlet-i mezbûreyi kabûl eyledi biz bu husûsa şâhidleriz şehâdet dahi ederiz deyü edâ-i şehâdet-i şer‘iyye edip ba‘dehû meblâğ-ı merkūmu vekîl-i mersûma teslîm eylediğine dahi beyyine taleb olundukda udûl-i Müslimînden İbrahim b. Pervane nâm kimesne hâzır olup gıbbe’l-istişhâd fi’l-vâkı‘ mezbûr Osman Beşe mahmiye-i İstanbul’a geldiğinde mezkûr Süleyman Ağa vekâleti hasebiyle zikr olunan kırk şerîfî Filoriyi mersûm Osman Beşe’den taleb edip huzûrumuzda bi’t-tamâm ve’l-kemâl yedinden alıp kabz eyledi bu husûsa şahidim şehâdet dahi ederim deyü edâ-i şehâdet-i şer‘iyye edip ve hâlâ maşrık seferinde olup müddet-i sefer ba‘id olmağla meclis-i şer‘a huzûru müte‘azzir olan Halil Bey b. İbrahim nâm şâhid-i asl âhar işhâd eylediği el-Hâc Receb Bey b. Pîrî Eyüb ve Himmet Beşe b. İsa er-râcil meclis-i şer‘a hâzırân olup aslımız olan mezkûr Halil Bey bizi işhâd edip dedi ki; ben şâhidim şehâdet dahi ederim ki; mezbûr Osman Beşe mahmiye-i İstanbul’a geldiğinde mezbûr Süleyman Ağa vekâleti hasebiyle zikr olunan kırk şerîfî Filoriyi mezbûr Osman Beşe’den taleb edip huzûrumda bi’t-tamâm ve’l-kemâl yedinden alıp kabz eyledi siz dahi benim bu şehâdetim üzerine şâhid olup şehâdet edin dedi biz dahi mezkûrun bu şehâdeti üzerine şâhidleriz şehâdet dahi ederiz deyü edâ-i şehâdet-i şer‘iyye eylediklerinde şuhûd-ı merkūmûnun şehâdetleri ba‘de ri‘âyeti şerâʼti’l-kabûl makbûle olup mezkûr Mahmud talebden men‘ olundu. Tahrîren fî-evâil-i şehri Ramazâni’l-mübârek li-sene târîh. Şuhûdü’l-hâl: Ömer Beşe b. Osman Seroda, Cârullah b. Taceddin, el-Hâc Mehmed b. İbrahim el-matlabi, Mustafa Beşe çukadar, Ahmed Ağa reîsü’l-muhzirîn, el-Hâc Mahmud b. Ali, Mehmed b. Mustafa ve gayruhüm.