Bab Mahkemesi 54 Numaralı Sicil (H. 1102 / M. 1691) cilt: 20, sayfa: 190 Hüküm no: 207 Orijinal metin no: [33b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmail b. Abdullah’ın araba kirasından Ayşe bt. Mehmed’de alacağı olduğu Mahrûse-i Edirne arabacılarından işbu râfi‘ü’l-kitâb İsmail b. Abdullah nâm kimesne mahfil-i kazâda Ayşe bt. Mehmed nâm hâtun mahzarında üzerine da‘vâ ve takrîr-i kelâm edip, mezbûre Ayşe zimmetinde bundan akdem Edirne’den İstanbul’a gelmek için benden istîcâr ve kabz eylediği araba kirâsından yirmi guruş hakkım olup hattâ mezbûr mahzarında ikrâr dahi ettikden sonra meblağ-ı mezbûrun yedi guruşunu bana edâ ve teslîm [ve bâki] on üç guruş zimmetinde kalmakla, hâlâ taleb eylediğimde edâdan imtinâ‘ eder suâl olunup alıverilmesi matlûbumdur dedikde, gıbbe’s-suâl ve akībe’l-inkâr, müdde‘î-i mezbûrdan müdde‘âsına mübeyyine beyyine taleb olundukda, udûl-i ricâlden Ahmed Çelebi b. Halil ve Mustafa b. Ali nâm kimesneler li ecli’ş-şehâde meclis-i şer‘-i şerîfe hâzırân olup istişhâd olunduklarında, fi’l-hakīka mezbûre Ayşe Hâtun müdde‘î-i mezbûra vech-i muharrer üzre araba kirâsından meblağ-ı mezbûr yirmi guruş zimmetimde edâsı lâzım-ı deynimdir deyu bizim huzûrumuzda ikrâr ve bizi işhâd etmişdi. Biz bu husûsa bu vech üzre şâhidleriz, şehâdet dahi ederiz deyu her biri edâ-i şehâdet-i şer‘iyye eylediklerinde, ba‘de’t-ta‘dîl ve’t-tezkiye şehâdetleri makbûle olmağın, mûcebince meblağ-ı bâkī on üç guruş müdde‘î-i mezbûra def‘ ve teslîme mezbûre Ayşe Hâtun’a tenbîh olunup, mâ hüve’l-vâki‘ bi’t-taleb ketb olundu. Fi’l-yevmi’s-sâdis min Cumâdelâhire li sene isneteyn ve mi’e ve elf. Şuhûdü’l-hâl: İbrahim Çelebi b. Ahmed, Ahmed b. Şaban, diğer İbrahim Çelebi b. Mehmed, Ali Beşe b. Bâli.