Bab Mahkemesi 54 Numaralı Sicil (H. 1102 / M. 1691) cilt: 20, sayfa: 189 Hüküm no: 206 Orijinal metin no: [33b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Mehmed ile kızı Hatice’nin terekeleri hususunda varislerden Ahmed’in Mustafa ile sulh olması Mahmiye-i İstanbul’da Karaki mahallesi sâkinelerinden iken bundan akdem fevt olan Sâliha bt. Mehmed nâm hâtunun verâseti, sadrî oğlu Mustafa ve sadriye kebîre kızı Hatice’ye münhasıra olup kable’l-ahz mezbûre Hatice dahi fevt olup, verâseti zevc-i metrûku Ahmed b. Hüseyin Efendi ve karındaşı merkūm Mustafa’ya münhasıra ve tashîh-i mes’elesi altı sehimden olup sihâm-ı mezbûrdan beş sehim merkūm Mustafa’ya ve bir sehmi mezbûr Ahmed’e isâbet ve intikāl eylediği şer‘an sâbite ve müte‘ayyin oldukdan sonra mezbûr Ahmed meclis-i şer‘-i şerîf-i enverde, tereke-i müteveffât-ı mezbûreye vâzı‘u’l-yed olan merkūm Mustafa mahzarında ikrâr ve takrîr-i kelâm edip, tereke-i müteveffât-ı mezbûrdan olup mahalle-i mezbûrede vâki‘ bir tarafı Fodla Kâtibi Ali Efendi menzili ve iki tarafı Mahmud Çavuş Vakfı ve bir tarafı tarîk-i âm ile mahdûd iki fevkānî oda ve bir sofa ve bi’r-i mâ ve havluyu müştemil mülk menzili, benim iznimle merkūm Mustafa iki yüz seksen guruşa âhara bey‘ ve kabz-ı semen ve semen-i mezbûrun kırk altı guruşunu mesârif-i mu‘ayyenemize sarf edip iki yüz otuz dört guruşu yedinde bâkī kalmışdır. Hâlâ meblağ-ı bâkī-i mezbûrdan benim bir sehim hisseme isâbet eden otuz dokuz guruşu merkūm Mustafa bana def‘ ve teslîm, ben dahi yedinden tamâmen ahz u kabz ve istîfâ edip, müteveffâ-yı mezbûretânın terekelerine müte‘allika âmme-i da‘vâdan âharın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledik dedikde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis min Cumâdelâhire li sene isneteyn ve mi’e ve elf. Şuhûdü’l-hâl: El-Hâc Ahmed b. Mehmed, Yusuf Çelebi b. Abdullah, Vekîl-harc Ahmed Çelebi, el-Hâc Mustafa b. ( ), Mehmed Halîfe b. ( ), Bayram Bey b. ( ).